Ногай районынынъ Яшавшыларды социаллык яктан канагатлав комплексли орталыгы «Демография» деп аталган миллет проектининъ «Ясуьйкен несил» деген подпроектин белсенли кепте яшавга шыгарады.

Бу проект бойынша социаллык куллыкшылары авыл еринде яшайтаган 65 ястан арткан аьдемлердинъ эм сакат аьдемлердинъ савлыгын тергев ниет пен оларды эмлев учреждениелерине еткередилер.
Эсли эм савлыгы яктан колайсыз аьдемлерди аькетуьв уьшин айырым алатлары болган «Луидор» автомобиль коьлиги кулланылады.
Гражданлар эмлев учреждениелерине Ногай ЦРБ бас врачы эм КЦСОН директоры ара беркитилген авыл ерлерине мобильли бригадалардынъ барув графиги мен келисли кепте еткериледилер.
Быйылдынъ басыннан алып Орталыктынъ куллыкшылары районнынъ эмлев учреждениелерине 6 кере катнап, 89 гражданларды элтегенлер. Солардынъ ишинде 65 ясыннан арткан – 71 эм 18 сакат аьдем аькетилген.
Бизим хабаршы.