Янъыларда Ново-Дмитриев-ка авыл орта мектебинде окувшылар арасында наркотиклерге карсы болув акциясы уйгынланып оьтти. Акциядынъ бас мырады – яслар арасында ден савлык маданиятын кеплендируьв эм тербиялав, окувшылар арасында наркоманиядынъ яйылувынынъ алдын шалув. Амалламадынъ оьтуьвинде Ново-Дмитриевка авыл орта мектебининъ окытувшылары эм окувшылары ортакшылык эттилер. Мектеб окувшылары айырым эсти оьспирлердинъ эм балалардынъ арасында психоактивлик амаллары ман пайдаланувынынъ алдын шалувына, оьсип келеятырган несилинде наркотиклерди суьймевликти кеплендируьвине караттылар.

«Таьтли яшавдынъ увыткыш емислери» деген акция бойынша 8-11-нши классларынынъ окувшылары ортакшылык эттилер. Окувшылар «Изгой» деген кыска метражлы художестволык фильмин карадылар, фильмди караганнан сонъ, олар коьргенлери бойынша белсенли кенъес юриттилер. Окувшылар социумдагы психоактивлик амаллары ман пайдаланув бойынша маьселелери эм оьсип келеятырган несил яшавдынъ савлык кебине карасы акында ойлары ман боьлистилер.
«Сенинъ сайлавынъ» деген акциясы челлендж кебинде оьтти. Окувшылар арасында наркотиклерге карсы болувга шакырув этуьв челледждинъ бас темасы болды.
Окувшылар яшавдынъ савлык кебин не себептен сайлайтаганы акында оьз ойлары ман боьлистилер эм социаллык тармагыннан алган ролигин коьрсеттилер.
«Наркотиксиз таза микрорайон» деген акциясы бойынша волонтерлар ман куьп туьзилди. Олар акциядынъ мырады акында кенъес озгардылар, орамда волонтерлар Роспотребнадзордынъ талаплавларын тутувы ман, яшавдынъ савлык кебин юритуьви акында шакырувларды эм листовкаларды пайладылар.10-11-нши классларынынъ окувшылары арасында «Бирге биз баьри затты да енъермиз» деген квест ойыны да озгарылды.
Соьйтип, яшавдынъ савлык кебин яйылдырув эм наркотик-лерге карсы болув акциясы окувшылар уьшин бек пайдалы эм кызыклы аьлде оьтти.
Суьвретте: шарадан коьринис.