Янъыларда ДР-нынъ орманлык хозяйствосы бойынша Комитетте онынъ басшылыгы астында аьрекет этетаган учреждениелерининъ баьри етекшилери катнасув ман кенъес озгарылды.

Кенъес басында Дагестаннынъ орманлык хозяйство етекшиси Вагаб Абдулхамидов коллективке оьткен 2022-нши йылда ийги ис коьрсетимлерге етискени уьшин разылык билдирди.
Белгилев керек, регионда орманлык еринде от туьсуьвлерди кемитуьв бойынша Дагестаннынъ орманлык хозяйствосы салынган борышты уьстинликли толтырды. Кенъесте белгили болганлай, республикада бир уьйкен от туьсуьвлер болмаган, тутанып янган кайбир кишкей затлардан баска.
Бу яктан куллык юритуьвге яваплылык пан карамага керегин белгиледи Вагаб Абдулхамидов, янъыларда коллектив пен Министрлер кабинетининъ етекшиси Абдулмуслим Абдулмуслимов сога уьйкен эс каратпага керек деп айтканды эсапка алып.
Солай ок Дагестан орманлык хозяйство етекшиси, премьер белгилегенлей, совет заманында Ногай орманлык хозяйствосында тереклер урлыгын шашып, яс тереклерди оьстируьв бойынша болган питомникти кайтадан тувдырув бойынша шаралар коьруьвге айырым эс каратпага керегин айтты.
Вагаб Магомедовичтинъ белгилеви мен, йыл сайын «Эс бавы» эм «Орманлыкты саклайык» деп озгарылатаган акцияларда ортакшылык этетаган яслар саны оьсе береди. Сондай акциялар яс несилдинъ орманлыкты эм табиатты аявлап саклавга уьйретеди. Бу эки савлайроссиялык акциялар бойынша Ногай районында онлаган мынъ яс тереклер олтыртылган, сонъында олар йыллар бойы кумлы тоьбешик эм саз ерлерде тамырласып, уьйкен тереклер болдылар.