Шуьмлелик авыл орта мектебинде тувыл экеш, савлай сол авылдынъ яшавшылары арасында Закарья Рамазан увылы Рамазанов сый казанып келеди. Ол 1967-нши йылда мектебти кутарады, сол заман окытувшы кесписин сайламага да токтасады.
Окытувшы – дайымлык аьрекет, оны тек кеспи деп айтып калмай, сол кеспиди сайлаган аьдемнинъ яшав оьмирининъ бир кеби деп айтпага да болады. Буьгуьнлерде сайлаган кесписи бойынша Закарья Рамазанович кырк йылларга ювык заман иследи эм яшавын суьйикли исине, балаларга багыслап келди.
– Авыл окытувшысы болув тынышлардан тувыл. Сен яваплылыкты терен сезбеге, куьн сайын билиминъди кенъейтуьв уьстинде ислеп турмага борышлысынъ. Ис аьрекетти уьстинликли этер уьшин, тек билимли болув аз, сенде аьрекетти уйгынлап болув касиет болмага тийисли, – дейди буьгуьнлерде сулыплы окытувшы. Оны таныган, дерислерин бергенин коьргенлер, сол дерислердинъ кайдай кызыклы оьтетаганлары акында, аьр бир балага бек анъламлы болатаганлары акында айтадылар.
Педагогикалык ис аьрекетти оьр бардырар уьшин, Закарья Рамазановичтинъ билдируьвлерине коьре, аьр бир баладынъ юрегине тувра сокпак салмага керек болады. Эгер окытувшы ман окувшыдынъ араларында анъламлык болса, ислемеге де тыныш болады, олар бир-бирине сенедилер. Керек болса, олар яшав маьселелерин де шешуьв уьстинде соьйлемеге боладылар. Ол балалар ман бирге суьйинип те, кайгырып та болатаган аьдем. Оны тек окувшылар тувыл, ис йолдаслары да бек сыйлайдылар. Бу куьнлерде ол тийисли тыншаювда болса да, окытувшылык аьрекетти яшав оьмири бойынша бардырады. Ол яс окытувшылар ман ис сулыбы ман боьлиседи, балаларга коьрген ерде насихатларын берип турады. Ол, коьп йыллар артта яккан от аьли де соьнмеегин билемиз. Солай болганда, сулыплы окытувшы ман балалардынъ да дослыгы болаяк. Ол балаларга тийисли тербия бергенлей, оьзининъ белиннен тувган увыллары Рашид пен Рабаданга, кызлары Мадина ман Марияга да бермеге шалысты. Олардынъ аьр бириси яшавда оьз орынларын тавып, ислейдилер. Кызлары ата йолын кувып, окытувшылык ис аьрекетин бардырадылар.
Уьстимиздеги йылдынъ навруз айынынъ ишинде Шуьмлелик авыл орта мектебининъ сулыплы окытувшысы Закарья Рамазан увылы Рамазанов оьзининъ 70 йыллык мерекесин белгиледи. Сол куьнин де ол оьзининъ авылында, оьзи окыткан балалары ман, ис йолдаслары ман бирге йолыкты. Олар болса, ясуьйкен насихатшыга оьзлерининъ ийги йоравларын айтып, ден савлык йорап, дайым яшав оьмири тек суьйинишке, суьйимге толы болганын сагынадылар. Биз де Закарья Рамазан увылы Рамазановка оьзимиздинъ ийги йоравларымызды айтып, йогары коьнъилликти, балалар ман катнасын уьзбей, яшав оьмирди суьргенин суьемиз.
Г.Сагиндикова.
Суьвретте: З.Рамазанов.
