Аьдемлерди эмлев тыныш ислерден тувыл.
Сол исти толтырмага билимли врачларга танъ юрекли медсестралар ярдам этедилер. Маразды аянлап, эмлев йорыгын туьзип берген врачтынъ буйырыкларын медсестралар толтырадылар, соны ман авырувлыды аяк уьстине салувда олардынъ уьйкен уьлиси болады. Буйырык толтырувдан оьзге, медсестралар куьндегилик исинде, авырыганлардынъ тоьмен коьнъилин коьтерип, оларга мараз бан куьреспеге куьш берип келедилер. Коронавируслы маразынынъ пандемиясынынъ тыныш болмаган заманында медсестралар врачлар ман бирге сав куьшлерин салып, аьеллерин калдырып ислегенлер. Олардынъ аьр кайсысына, авырыган куьнлеринде йылы соьзи мен коьтергишлегенлери уьшин, оьз разылыгын эмленгенлер билдиредилер. Ногай ЦРБ-дынъ баска медицина куллыкшылары ман бирге Вагидат Башантавовага да «кызыл зонада» коронавируслы маразлыларга оьз ярдамын этпеге туьскен. Ол кишкей заманыннан алып, ярдам этуьв мен байланыслы исти юритеекпен деп ойланатаган болган. Вагидат Нариман авылында яшаган Айнадин эм Ырсбийке Даутовлардынъ (яткан ерлери еннетли болсын) бес баласынынъ энъ де уьйкени, сога коьре синълиси мен аданасларына кыскаяклы маслагатшы эм коьмекши болып бу куьнлерде де юреди. Тек оьзининъ кардашювыклары ман тувыл, кыскаяклы, сабыр касиети мен, баьри мен де тил тавып болады. Оьзининъ кайынанасы Сакинат пан (яткан ери ярык болсын), келинлери Камиля эм Алина ман баьрине де коьрим болгандай катнаслар туьзип, юриткен. Оьзек те, аьдемнинъ яшавында суьйинишли эм кайгылы, тынышлы эм авыр куьнлер болады. Сондай заманлар Вагидаттынъ яшавында да болганлар. Ювыклары оны ман косылып суьйингенлер эм кайгылы куьнлерде хаьтерлеп келгенлер. Вагидат Айнадиновна Кизляр каласындагы медициналык училищесин окып тамамлап, ис аьрекетин 1991-нши йылда Ногай орталык больницасынынъ инфекция боьлигинде медсестра болып баслаган. Сол йыллар ишинде кыскаяклыга коьп авырыганларды коьрмеге, оларга ярдам этпеге, коьп затка уьйренмеге туьседи. Куьннен-куьнге онынъ ис сулыбы да оьседи, усташа эм яваплы ис борышларын толтыратаганын белгилейтаганлардынъ саны да инфекция боьлигинде эмленгенлердинъ сырасында оьседи. Оннан оьзгелей, онынъ авырувлыга яны авырувын да олар сезбей болмайдылар. «Алдынгы кыйынлы йылларда, больницада дарманлар аз заманда, кишкей кедем мен ЦРБдынъ инфекция боьлигинде яттым. Балага косып уратаган эки дарманнынъ бириси йок болыпты экен, сонъ Вагидат Башантавова бу дарманнынъ ялгыз бирисин балага урса, ога авыртарма экен деп, оьзине урып карады», – деп мага хабарлаган эди бир кыскаяклы. Оннан оьзгелей де, коьп аьдемлерден Вагидат Башантавова акында ийги соьзлер, боьтен де коьп ызгы йыллар коронавируслы маразынынъ пандемиясы заманында «кызыл зонада» медицина ярдамын алганлардан эситкенмен. Онынъ ийги иси тек маразлылардынъ мактав соьзлери мен тувыл, бир неше Сый грамота ман да белгиленген. Вагидат Башантавова оьзининъ увылы ман кызына, ян йолдасы яслай дуныядан кешкени мен байланыста, оьзи ата эм ана болып, ийги тербия бермеге шалыскан. Джалиль Пятигорск каласында билим алган, Алжанат анасынынъ йолын алып барып, Сургут каласында медициналык колледжинде окыган. Олар экеви де оьз аьеллерин курганлар. Аьр дайым да яшав йолы енъил болмаган болса да, Вагидат Башантавова оьзин бек наьсипли кыскаяклы деп санайды. Суьйикли исинде тапкан сыйы, кыйынын аклап билген балалары, бир соьзин де ерге туьсирмеген ювыклары – солай болганда, баскалай санап та болмаяк. Н.Кожаева.
Суьвретте: В.Башантавова.
