Уьстимиздеги йылдынъ август айынынъ 29-30-ншы куьнлеринде Казань каласында миллет СМИ-лер форумы болып оьтти. Казань каласында миллет СМИ-лер форумы болып оьтти. Форумнынъ бас ниети – Россия Федерациясынынъ миллет эм региональлик коьлемлик билдируьв амалламалардынъ буьгуьнги аьллери эм оьрленуьв йоллары акында соьз коьтеруьв эм сулып пан боьлисуьв эди.
Белгилеп озайык, бу йыл форум тогызыншы кере озгарылып туры. Сонынъ программасына бу йыл журналистлик усталыкты коьтеруьв семинарлары, келген конакларга Казань каласынынъ ярасыклыгын коьрсетуьв эм таныстырув да кирди. Форумнынъ барысында озгарылган йыйынларда уьйкен региональлик миллет баспа эм телерадиокомпанияларынынъ, билдируьв агентстволарынынъ етекшилери оьз ойлары ман, сулыплары ман боьлистилер. Миллет баспалар форумын «Интерфакс» етекшиси Н.Касьянов юритти. Бу шарадынъ уйгынланувы эм озгарылувы «Татарстан Республикасынынъ 2014-2025-нши йылларда патшалык миллет политикасын яшавга шыгарув» деген программасы аркалы болган. Баьриси форумда Россия Федерациясынынъ туьрли регионларыннан, районларыннан миллет баспа органларынынъ 60 етекшилери катнастылар. Солай ок, форумга профильли организацияларынынъ етекшилери де, айтпага, Государстволык Думасынынъ миллет ислери бойынша комитетининъ председатели Г.Семигин, «Гильдия межэтнической журналистики» регионлар ара ямагат организациясынынъ президенти М.Лянге, регионлар эм миллет гармонизация бойынша Россия Федерациясынынъ ямагат палатасынынъ комиссиясынынъ председатели В.Зорин (Zoom–социаллык тармак куьши мен, ызгы эки аьдем), «Сибирская генерирующая компания» ООО генераллы директорынынъ маслагатшысы М.Игнатьев шакырылган эдилер. Форумда катнасканлар ишинде «Шоьл тавысы» республикалык газетамыздынъ бас редакторы Эльмира Юнус кызы Кожаева да бар эди. Оны ман бирге Дагестан Республикасыннан форумда ДР Халк Йыйынынынъ депутаты, Миллет политикасы бойынша Халк Йыйынынынъ комитетининъ председателининъ орынбасары И.Алипулатов, Россия Журналистлер союзынынъ секретари, Дагестан Республикасынынъ Журналистлер союзынынъ председатели А.Камалов та форумда катнастылар.
