Сав тислер тек ярасык куьлемсирев болып калмай, савлай ден савлыктынъ маьнели туьзуьвшиси боладылар.
Бала тувган биринши айлардан алып онынъ тислерине уьйкен эс этилинеди: баслап анасы суьйиниш пен онынъ шыккан биринши тислерин коьреди, оннан сонъ стоматологтынъ шерети. Ол болса баладынъ тислери сав болса суьйинеди, онынъ уьшин сав тислер – энъ де ийги савкат.

Увыт айынынъ 9-ншы куьнинде Халклар ара стоматолог куьни белгиленди. Бу куьн стоматологты байрам ман кутлап, ярасык куьлемсирев савкатлаганы уьшин савбол айтув бек ийги. Соьйтип, янъыларда «Гьидаят» хатынлар орталыгынынъ куллыкшылары Дагестан Республикасынынъ ат казанган врачлары Сания Мусаевна Салиховады эм Светлана Бадиевна Гапаровады стоматолог куьни мен кутладылар. Белгиленген врачлар коьп йыллар узагына Ногай район яшавшыларынынъ тислерин эмлеп келгенлер. «Гьидаят» хатынлар орталыгынынъ куллыкшылары врачларга гуьл байламлар эм савкат тапшырдылар. Ак юректен ден савлык эм берк иман йорадылар.