Янъы окув йылынынъ келуьви мен мектеблерде белсенли аьрекет те басланады. Аьр кайсы мектебтинъ каралдысы балаларга, олардынъ завклы ойынларына толады. Кыскаша айтканда, мунда ян энеди…
Окытувшылардынъ да ис борышлары коьбееди. Олар янъы окув программасына коьре аьрекетин уйгынлайдылар. Ызгы заманларда педагогикалык программаларга да коьп янъылыклар киргенлер, ама кайсы заманда болса да, окытувшы тербиялав исин бардырмага борышлы болады. Тербия деген не? Меним ойымша соны мысаллар аркалы коьрсетип анълатса, соннан уькен пайда да болмас эм окувшыдынъ эсинде де коьп зат калады. Орыс тилинде айтылган айтув кимик «Юз кере эситкеннен, бир кере коьргенинъ яхшы».
Ызгы заманларда патриотлык тербия акында коьп айтылады. Сол да босына тувыл, заман да сондай болды. Эм, булай айтканда, аьр бир россиянлы гражданиннинъ менлигин де кеплевши нышанлардынъ алды сырасында да патриотизм турады.
Согыс спецоперациясы. Элге яв шапканда, Элди коршалавга эр йигитлер шыгадылар. Сога шайыт – бизим тарих. Артта Уллы Аталык согысы, Афган, Шешен Республикасындагы согыс кампаниялар… Аьр кайсысында да элди коршалавга шыккан аьдемлер саны аз болмаган. Аьлиги заманларда да сондай болып, йигитлеримиз, биревлери сайлаган аьскерлик борышы бойынша, баскалар оьз ыхтыярлары ман, биревлер патшалыктынъ талаплавы ман Россия Федерациясынынъ кызыксынувларын яклавга шыкканлар. Сол коршалавшылар санында бизим юзлеген авылдасларымыз, ювыкларымыз, тенълеримиз де бар. Оьткен согысларда йигерлик, йигитлик коьрсетип, данък казанган аьдемлерди биз тек окыганымыздан билип,
олар ман оьктемсиген болсак, буьгуьнлерде Баьтир атларга тийисли болганлар ман таныс та болып шыгамыз… Олар тийисли тыншаюв болжалына келгенде, туьрли йолыгыслар да (ис борышымызга коьре) уйгынлаймыз. Мектеб окытувшылары да, биздей болып, окувшыларын сол баьтирлер мен таныстырмага, биринши авыздан СВО хабарларын тынълатпага, олар аркалы патриотизм сезимлерин оьсип баратаган несиллерге коьндирмеге шалысадылар. Ногай районымыздынъ Терекли-Мектеб авылынынъ ярасык, ярык, янъы ярастырылган А-Х. Джанибеков атындагы мектебининъ бесинши класс окытувшысы Насипли Исраиловна янъы алган балаларына оьзи мен бир класста окыган тенъ йолдасы, бу куьнлерде ис аьрекетин Элди саклав ман байланыстырган йигит яс Аскер Сагындык увылы Абубекеровты конакка шакырды.
Йолыгыс бек кызыклы эди. Бу куьн конак болып келген Аскер окувшыларга ден савлык йоравдан соьзин баслады. Ол, оьзининъ сайлаган кесписи акында хабарлай келип, балаларга йигитлик деген аьдем сапаты экенин анълатты. Бу куьнлерде эр кисиге сол энъ де керекли зат болады. Аскер Россия ФСБ япсар управлениесининъ куллыкшысы болып ислейди. Онынъ ис аьрекети тынышлардан тувыл. Соны эр киси оьзи кеспи сайлаганда да билген. Йолыгыстынъ барысында коьп кызыклы билдируьвлер эситтилер окувшылар согыс спецоперациясында катнасатаган эр кисиден.Сондай шаралар балалардынъ эслеринде коьп заманларга сакланадылар эм бир яркын ыз да калдырады. Бирбалалар сондай йолыгыслардан сонъ бас геройга усамага да шалысадылар, ол ийги коьрим де болып калады, биревлердинъ бактыларында сондай коьрисуьвлер айырым бир орында тутпага болады… Ким биледи алдыдагы яшавдынъ кайдай болаягын…
А буьгуьнги окытувшыдынъ бас борышы – тийисли несилди тербиялав. Насипли Исраил кызы Аджигайтаровадынъ оьзининъ дерисине Аскер Абубекеровты шакырувы – балаларга Баьтирлер янымызда, олар бизим яшав оьмиримиз уьшин оьзлерининъ янларын аямай юргенлерин, Элди коршалав да бекмаьнели экенин коьрсетуьв эди. Ол мырадына етти. Йолыгыстынъ ызында Аскер окувшыларга «ата-анады тынъланъыз», «мектебте берилетаган билимди толы кепте алынъыз», «Элинъизди, Аталыгынъызды суьйинъиз» деген маслагатларын берди. Сондай болып оьтти бу куьнги йолыгыс. Кызыклы эм алдыда бу урысларда да Россия эли енъуьвши болаягына сеним коьндируьв мен тамамланды…
Галима Курганова.
Суьвретте: йолыгыстынъ барысында.
