«Аьдем яшавынынъ маьнесин оьзи белгилейди, а яшавдынъ маьнеси болса, инсан оьзининъ ис болувлыгын яшавга шыгарувда, сонынъ уьшин ога оьз куьшине сенуьв эм ян берклик керек», – деп айткан Эрих Фромм. Бу соьзлер Терекли-Мектеб авыл яшавшысы, абырайлы аьел бийкеси Олимпия Шангереевага келисли. Ол кайсы ис орында да, исин бажарымлы толтырып, оьзининъ акында ийги ат калдырады. Муннан коьп йыллар артта яс кыз, Карагас авыл мектебин уьстинликли тамамлап, Махачкаладагы Авыл хозяйство патшалык университетинде билим алган. Мектеб йылларын да, студент йылларын да Олимпия емисли озгарып, баьри болган куьшин кулланмага шалыскан. Ол ис аьрекетин Москва каласында «ВКОЭЛ-Строй» ООО офисинде менеджер болып баслаган. Элимиздинъ бас каласында амаллар коьп болса да, ясларды ногай шоьли, ювсан ийиси оьзине тартады эм олар тувган Ногай районга кайтадылар. Сол заманга Олимпия Рашид Шангереев пен янъы аьел курган болган. Ногай районда яс кыскаяклы Терекли-Мектеб авыл администрациясында специалист, сонъ Ногай район бойынша Россия Федераллык налог службасынынъ инспекциясынынъ ТОРМ-да тамада налоглар инспекторы, бас налоглар инспекторы, КП-З боьлигининъ етекшисининъ орынбасары болып куллык эткен. Аьли болса, Ногай район билимлендируьв боьлигинде экономист исин юритеди. Кайсы ис орында да Олимпия Ахмедовна оьз билимин эм аьдемшилигин коьрсетип болган. Ногай район бойынша Россия Федераллык налог службасынынъ инспекциясынынъ ТОРМ-да Олимпия ислеген йыллар Кизляр, Бабаюрт, Сухокумск, Тарумов эм Ногай районларын аьжетсизлеген. Боьлик куллыкшылары, баска ислерден оьзге, тийисли тыншаювдагы эслилер мен сакатлардынъ муьлкине эм коьлигине шыгарылган налогларга льготалар туьзеткенлер. Бек коьп аьдемлер мен ислемеге эм олардынъ соравларына явап бермеге туьскен. Олимпия болса, аьр биревдинъ эбин тавып болганы акында сол замандагы етекшиси Тагир Караев айтады: «Олимпия – бек яваплы куллыкшы, келген аьдемлердинъ соравларына толы явап берип, анъламлы этип закон бойынша анълатады». Ийги иси уьшин Олимпия Шангереева етекшилевден разылыкларга тийисли болган. Кыскаяклы аьли баска исти бардырса да, районымыздынъ яшавшылары налоглар тоьлев бойынша соравларын ога бередилер, маслагат сорайдылар. Яхшылык этуьвге куьн яде кеше болмайды дегенге усап, Олимпия кайсы заманда да оьз коьмегин этпеге аьзир.
Рашид эм Олимпия Шангереевлер оьзлерине ата-анасы ийги тербия бергенлей, соьйтип уьш баласын да оьстирмеге шалысадылар. Согыс ветеранынынъ, окытувшылардынъ уныклары оьз ясуьйкенлерининъ сыйлы атына тийисли болмага шалысып, оьзлерин окувда да, мектеб, ямагат яшавында да, куллыгында да коьрсетпеге шалысадылар. Оьзек те, бизим атайлар билмей айтпаган балалардынъ касиетлери туьзилуьвинде анасынынъ орынын.
Орыс язувшысынынъ аьдемнинъ тыскы эм ян ярасыклыгы акында соьзлери де бизим Олимпияга келисли, соны ман бирге ол ийги ана да, ян йолдас та, конаксуьер уьй бийкеси де болады.
Н.Кожаева.
Суьвретте: О.Шангереева.