Авырлык сезиледи аьдемнинъ ян тоьринде, ишки сезимлеринъ боьлинсе. Биз дайым да
яшавда орын тапкан баьри зат Алла-Тааладынъ аьмири мен болады деп айтамыз эм сол затка муькир де боламыз…
Муннан бир йыл артта согыс спецоперация оьтеяткан ерде киели аьскерлик борышын толтырувда бизим ердесимиз Ислам Абдулбариев йигитлерше ян берди. Яс янын курманлык этти, ол тувган ери уьшин яв ман куьресте.

Дуныядан тайганына каты кайгырамыз, ама соны ман бирге оьктемсиймиз: ол – бизим халкымыздынъ баьтирлерининъ бириси, мобилизация басланув ман СВО ерине кеткен аданасынынъ артыннан бизим элимизди, бизим парахатлыгымызды эм тынышлыгымызды коршалавга. Оькинишке, 7-нши майда ол топырак болды, анасынынъ тувган куьнинде арамыздан тайды: оьзек те, юректи тырнайтаган авыр кайгы, бу эки оьзгерислердинъ май айынынъ бир куьнинде болганы ман дайым да юректе сакланаяк эм бир де эмленип болмаяк юрек дерти. Йыл оьтип, Исламнынъ акыр асында Баьтирдинъ ялгыз карындасы Татлиханды излестиремен, ама ол коьзлериме бир де илинмейди, йок эди ол уьй меканы ишинде де, сыякта да. Соны ман, оны коьрмей, кетпеге де туьсти…

Эм тек янъыларда аданасы Руслан Абдулбариевтен онынъ дуада болмаганынынъ себебин билдим. Сол куьн, 7-нши майда, Таьтлихан Москва каласынынъ балалар туватаган уьйин-
де Алла-Тааладынъ аьмири мен дуныя юзине ткедеди эндирген. 7-нши май куьнинде! Тувган кишкей эр саьбийин баьри мусылманлар уьшин киели, Абдулбариевлердинъ аьелинде энъ баалы — Ислам деп атадылар. Коьзлерим анъсыздан коьзясларга толды. Белки, назарымды бийлеген коьз тамшылары суьйинишли коьзяслар болар… Алла-Тааладынъ тоьбеден аьмир этуьви мен дуныя юзине бала энип, ога берилген Ислам аты бу аьелде тири эстелик болып калаяк. Мен Гульфира эм Бегали Абдулбариевлерди кишкей саьбийлерининъ тувганы ман ак юректен кутлайман, сав-саламат, ярасык, наьсипли болып оьскенин эм тоьбеде дайым да таза аспан болганды йорайман.
Э.Бекмурзаева.