Эдиге авылында коьпбалалы татым аьеллер аз тувыл. Сондайлардынъ бириси деп мундагы Атаевлердинъ аьели саналады, олар соны ман бирге белсенли яшав орынын тутувы ман да белгили. Олар быйыл да оьз гражданлык борышын толтырувга яваплы кепте янастылар эм аьели мен бирге сайлавларга келдилер. «Атаевлердинъ увыллары эм кызлары баьриси де оьсип уьйкен болганлар, олар эндиги оьз алдына тавысларын бередилер. Аьел басы Динислам Атаев олар уьшин тек гражданлык борышты толтырып калмай, солай ок аьел мен бирге сайлавларга барув дегенди ийги аьдет кебинде балаларга беруьв маьнели экенин белгиледи. Сондай аьеллерди сайлав участогында коьргенде, коьнъил коьтериледи. Ол – бизим халк аьдетлеримиздинъ эм белсенли гражданлык борышты толтырувдынъ ярык уьлгиси. Биз сайлавларга аьдемлер бирерлеп тувыл, аьеллери мен бирге келгенлерине бек суьйинемиз», – деди Эдиге авыл сайлав участогынынъ председатели Кабират Елгишиева. Оннан баска болып, бу авыл еринде 50 йыл эм соннан да артык заман бирге яшаган ян косаклар да сайлавлардан кери калмадылар. м-А.Юнусов.