НКО Уьйи туьзиледи – саваплык эм ямагат организацияларын колтыклав кенълиги. «Солнечный берег. НКО. Новый вектор» форум катнасувшылары сол коммерциялык тувыл сектордынъ аьрекетининъ оьрленуьви эм алдыда куллык этуьви акында соьз юриттилер. Уьстимиздеги йылдынъ март айында болган баьлеказа калдыкларын тайдырувда саваплык фондлардынъ эм волонтерлардынъ аьрекетининъ уьйкен маьнелигин коьрсеттилер. Олар биринши болып, кыйынлыкка калган аьдемлерге ярдамга еттилер. Сондай таза ниети мен ярдам этуьвге каратылган аьдем куьплерин, организацияларды колтыклав мырат пан Махачкала каласында НКО Уьйи туьзиледи. Мунда ямагат организациялар тегин консультациялар, грантлы аьризелерди аьзирлевде коьмекти алмага, социаллык проектлерди яшавга шыгарув шараларды озгармага боладылар. НКО Уьйине берилген меканда ярастырув куллыклар этпеге ниет бар, сол ислерди уьстимиздеги йылдынъ ызына кутарып, орталыкты келеек йылдынъ басында ашпага планга киреди. НКО Уьйининъ ресурслы орталыгы ДР Цифровизация, билдируьв эм баспа министерствосынынъ меканында болаяк. Олардынъ бас борышы – ямагат организациялары ман власть катнасын беркитуьв эм онъайлы этуьв, солай болганда, Дагестан Республикасынынъ яшавшыларына маьнели соравларды биргелесип шешпеге тыныш болар эди.