Кайбиримиздинъ яшавымызда спорттынъ туткан орыны ызгы тувыл деп эсиме келеди. Мектебте окыган йылларда физкультура дерислерде кыргып, ювырып, ярысларда да катнасып юргенмиз. Футбол аьлиги заманда энъ де белгили спорт кеби деп белгиленеди. Янъыларда бизим кишкей футболшыларымыз баьримизди де суьйиндирип, окувшылар лигасынынъ савлайроссиялык кезегинде катнасып, коьплеген командалардынъ сырасында кеделер – етинши, кызлар алтыншы орынды алдылар. Бу бек уьйкен уьстинлик. Терекли-Мектеб авылынынъ А-Х.Джанибеков атындагы мектебининъ футбол командасынынъ тренери Алан Ярикбаев эм Карагас авылдынъ мектебининъ кызлар футбол командасынынъ тренери Адильхан Менласанов пан йолыгысып, турнирдинъ эм футболшылардынъ акында хабарлаганын тиледик. 

Алан Ярикбаев – кеспили футболшы. Ол – Анжи академиясынынъ тербияланувшысы, тренер куллыгын 2021-нши йылдан алып юритеди. Республика бойынша эки кере 2012-нши йылда тувган яслардынъ ийги деген тренери деп белгиленген, куьмис призеры болган. Алан Ярикбаевтинъ айтувы ман, бу ярыста катнасув уьшин футболшылар коьп куллык эткенлер. Окув йылдынъ басыннан алып олар мектеб, муниципаллык, зоналык эм республикалык кезеклерди оьткенлер. 15 яска дейим балалар арасында окув футбол лигасы «Сактыян топ» ярыслар Анапа каласында Савлайроссиялык «Смена» балалар орталыгында оьтти. Футболшылар мунда тек оьз ойынын коьрсетуьв тувыл, белгили спортсменлер мен коьристилер, мастер-классларда, семинарларда катнастылар. Дагестан Республикасыннан уьш команда бар эди – Каратин гимназиясы (Ахвахский район), Терекли¬ –Мектеб школасы (Ногай районы) – кеделер эм Карагас мектеби (Ногай районы) – кызлар. – Джанибеков мектебининъ футбол командасында 12 кеделер катнастылар – Эльдар Курганов, Абдурахман Юнусов, Джамал Отовалиев, Сулейман Караев, Абдурахман Танбулатов, Нурлан Эдильбаев, Крымсолтан Ханмурзаев, Абубакар Койлакаев, Ислам Алыпкачев, Тимур Янполов, Мансур Янполов, Крымхан Арикбаев. Бу ярысларда 48 командалар катнастылар, бизим футболшылар 1/4 финалга еттилер, етинши орынга тийисли болдылар. Крымнан келген командады енъдилер эм куьпте экинши орынды алдылар. Арасында болган йолыгысларда Ярославльди енъдилер, 1/16 – Калининград, 1/8 – Калмыкия, 1/4 – Саратов областиннен командаларды енъдилер, – деп хабарлайды тербияланувшылары акында Алан Ярикбаев. Тренер «Мектебте футбол» проекти акында да айтады, аьлиги заманда район бойынша баьри мектеблер де бу проект бойынша ислейдилер. Сол проекттинъ аркасы ман мектеблерде стадионлар, футбол майданлар ашыладылар. Ызгы заманда Ногай районында футболдынъ ийги оьрленуьви баьримизди де суьйиндиреди, неге десе бу кызыксынув янъы енъуьвлерге, уьстинликлерге аькеледи. Алан Ярикбаев олардынъ сондай ярысларда катнасувына оьз демевлигин эткенлерге савбол айтады. «Ногайский район» МР администрациясы футболшыларды коьлик пен канагатлады. Терекли-Мектеб авылынынъ аькимбасы Марат Кулунчаков баьри катнасувшыларга спорт эм ойын кийимин савкатлады, футболшылар аьр заманда да онынъ коьтергишлевин сезедилер. Республика бойынша балалароьспир школасынынъ директоры Александр Ашотович Макаров ярыслар оьтуьви бойынша, куьн сайын тел согып, маслагатларын берип, дагестан командаларын коьтергишлеп турды. Тренер уьйкен савбол Россия футбол союзынынъ региональли координаторы, дагестан делегациясынынъ етекшиси Арсланали Русланович Магомедзапировка да айтады. Районда футбол спорты оьрленип турганын коьрип, сукланып эм сейирсинип калган ол. Буьгуьнлерде бизим спортсменлерди тек республикамыздынъ союзы тувыл, Россия дережесинде де белгилегенлер. Бизим футболшылардынъ уьстинликлери уьшин баьримиз де оьктемсиймиз. Енъуьвшилерге Сый грамоталар, медальлер тапшырылды. Ийги деген ойнавшы деп Эльдар Курганов белгиленди. Буьгуьнлерде Алан Ярикбаев кишкей кеделерди уьйретеди футбол ойнап.

 Тренердинъ айтувы ман, аьли олардынъ заманы, республика бойынша ойынларда катнасадылар, келер заман, олар да Россия бойынша ярысларда катнасып, чемпионлар болар. Ярасыклы ойынды Карагас авылынынъ К.Кидирниязов атындагы мектебининъ кызларфутболшылары да коьрсеттилер. – Бизим районнан бу ярысларда эки команда катнасканы кайбиримизге де суьйинишли болды. Кызлар тагы да бир кере оьзлерин коьрсеттилер, куьшли куьндеслер мен сынастылар, сулып алдылар эм уьйкен футболдынъ шынтылыгын сездилер. Олар, аьр бир топ уьшин сынасып, енъуьвге эрклигин, каты касиетин эм ийги ойынын коьрсеттилер, – деп хабарлайды Адильхан Менласанов. Кызлар куьп кезегинде биринши ойында енъдилер – Карагас – Тыва (3:1). Сонъында Карагас – Мордовия (5:2), Карагас – Сургут ХМАО (5:1). Бу бек ийги ойын, кызлар куьп кезегинде 13 топты киргиздилер, сол зат олардынъ ийги аьзирлигин, уьстинликке ымтылысын коьрсетти. Карагас мектебининъ кызлары 1/8 финалда Белгород командасын 3:0 эсап пан енъдилер. 1/4 финалда Воронеж каласынынъ командасы куьшли болды. Бизим кызлар окув футбол лигасынынъ савлайроссиялык кезегинде сыйлы алтыншы орынды алдылар. Кызлар командасы 2025- нши йылдынъ канътар айында туьзилген. Сол йыл язлыкта олар республикадынъ окув футбол лигасында катнастылар. Енъуьвши болмаса да, олардынъ бу сынаста касиетлиги катты, кызлар анъладылар – енъил енъуьвлер болмайды, сога коьре ислемеге, сулып йыйнамага керек. Командадынъ тренери Адильхан Менласановтынъ куьш салувы ман, кызлар бир йылдан сонъ республика бойынша чемпионатта биринши орынды алдылар. Сонъында Россия бойынша бизим кызларымыз, ийги деген командалар ман сынасып, енъуьвши болдылар. – Мага бизим командамыздынъ уьстинлиги – уьйкен куваныш. Кызлардынъ россия дережесине шыкканы меним уьйкен мырадым эди. Буьгуьн сол мырадымыз толды. Сога биз суьйинемиз эм оьктемсиймиз, – дейди Адильхан Менласанов. Бир йылдынъ сырагыларын бизим яс футболшыларымыз уьстинликлер мен тамамладылар. Келеекте спортсменлерге аьли де коьп енъуьвлер йораймыз. Г.Бекмуратова. Суьвретлерде: ярыслардан коьринислер.