Дагестан Республикасынынъ Оькиметининъ Председателининъ биринши орынбасары Валентин Клок Каспий флотилиясынынъ инфраструктурасын оьрлендируьв бойынша соравлары уьстинде йыйын оьткерди. Куьн йосыгында коьтерилетаган соравлар ман байланыста Каспий флотилиясында курылыс эм савытлы куьшлерди ерлестируьв бойынша етекшисининъ орынбасары Дмитрий Кожанов оьз доклады ман шыгып соьйледи. Бу куьн коьтерилген соравлар флоттынъ оьрленуьви уьшин бек маьнели эди. Солардынъ бир нешеви ведомстволар ара тар катнасувды, солай ок оьрленуьвге каратылган планларды кезеклеп яшавга шыгарувга мырсатлар ашувды талаплайдылар. Йолыгыстынъ тамамына коьре, Клок профильный министерстволардынъ етекшилерине маьселели соравларды шешуьвге каратылган йол картасын туьзуьвге буйырык берди. Вице-премьер исин толтырувшы айырым эсти Каспий флотилиясы ман бирге «Ипподром» микрорайонынынъ япсарын да оьрлендируьв проектин яшавга шыгарувга каратты. Онынъ ойына коьре, сондай карар Каспий флотилиясын эм онынъ тоьгерегиндеги япсарларды ийги оьрлендируьвге коьмекши де болар эм бар ресурсларды кулланувга амаллар да берер.