Бизим аьскершилеримиз шынты йигитлик коьрсетип, куьн сайын элимизди эм онынъ межелерин коршалап келедилер. Согыс спецоперациясында катнасып келетаган аьскершилерди коьтергишлев ниет пен билимлендируьв ошакларынынъ окувшылары, окытувшылары эм ата-аналары да туьрли патриотлык акцияларда белсенли ортакшылык этедилер.
Сондай акциялар балаларда Эли, аьскери, халкы уьшин оьктемлик сезимлерин тербиялавда маьнели орынды тутады эм йигитлик, коркынышсыз эл коршалавшыларынынъ уьлгисин ызламага коьнъиллендиреди.
Янъыларда Нефтекум районынынъ Коясыл авылынынъ маданият уьйинде акция катнасувшылары аьскершилерге ярдамласув ниет пен «Аьскершиге посылка» деген патриотлык шарада ортакшылык эттилер. «Оьзимиздикилерин тасламаймыз» деген отрядынынъ волонтерлары «Бирлик» яратувшылык куьбининъ катнасувшылары ман биргелес СВО катнасувшыларына ясырынув уьшин шилтерлерин аьзирлевде белсенли катнастылар. Кол оьнер усталыгы бойынша специалисти Эльвира Насибулаевна Байбулова да савгаларга деп юз капларын тигуьви мен оьзининъ уьйкен уьлисин косты. Маданият уьйининъ туьрли клуб биригуьвлери «Аьскершиге савга» деген акция бойынша согыс спецоперация катнасувшылары уьйлерине тез арада аман-эсен кайтканларын йорап язган хатларын эм таьтли савгаларын капларга аьзирлеп салдылар. Йыйылган савгалар ийги этип кепленип, каты урысларында ортакшылык этетаган аьскершилерге йиберилди.
Айтпага, Ставрополь крайынынъ Нефтекум районынынъ аькимбасы Дмитрий Сокуренко, депутат Заурбек Шерпеев, Нефтекум округында ерли ислер бойынша управление етекшиси Виталий Борзых, солай болып, муфтийдинъ биринши орынбасары Фаизрахман Эсенов согыс спецоперация еринде ортакшылык этетаган аьскершилеримизге гуманитарлык югин еткеруьвде ортакшыладылар. Сол акция бойынша олар СВО катнасувшыларына кийимлер, азык-туьлик, медицина ягыннан керекли амаллар, мотоцикллер, электрогенераторлар эсабында гуманитарлык югин еткердилер.
Депутат Заурбек Шерпеев Элимизге авыр шакта оьз ердеслерининъ тыпаклыгынынъ маьнелигин белгиледи эм, согыс урыслары тез арада тамамланып, тынышлык яшавы туьзилуьвине сенимин билдирди. Оннан сонъ Нефтекум район ериннен согыс спецоперация катнасувшылары округ яшавшыларына, айырым, аьскершилерге ясырынув уьшин шилтерлер аьзирлевде оьз уьлисин эткенлерге, айтпага, Нефтекумск каласында, Коясылда аьрекетлейтаган эки куьплери, солай болып, Кара-Тоьбе, Новкус-Артезиан, Тукуй-Мектеб, Махмуд-Мектеб авыл яшавшыларына уьйкен разылыгын билдирдилер. Солай болып, айырым разылыкты авыл яшавшыларына эм балаларга да караттылар.
Биз сол посылкалар аьскершилерге ийги савга болаягына сенемиз. Аьскершилеримизге оларды кардаш-тувганлары уьйлеринде, тувган еринде аьсиретли саклавы, олар ман шынты оьктемсуьви, дайым эслеринде тутувы бек маьнели.
Г.Нурдиннова.
Суьвретте: аьскершилерге посылкалар йиберилуьв мезгили.