Меним атым Ильяс Койлубаев. Мен Терекли-Мектеб авылында яшайман, Джанибеков атындагы мектебте биринши класста окыйман. Меним уьйкен атамнынъ аты Ильяс Абдурахман увылы Койлубаев, мен онынъ атын юритемен. Атайым мага коьп хабарлар айтады, оьзининъ атасы Абдурахман Койлубай увылы Койлубаев акында эскереди. Уьйкен атайымыз Уллы Аталык согысынынъ ветераны болган, ол баска аьскершилер мен бирге элимизди явдан коршалаган. Атайым Абдурахман (меним атам онынъ атын юритеди) Караногай районынынъ Батыр-Мурза авылыннан болган. Атайымыз ер мен ислейтаган болган, яслай Батыр-Мурза авылында янъы туьзилген «Бирликкен» колхозына туьседи.
Бизим уьйимизде уьйкен атайдынъ акында билдируьвлер, онынъ грамоталары, суьвретлери, язган хатлары йыйналган альбом бар. Мен алдын онынъ суьвретлерин карайтаган эдим, аьли окып боламан, кызыклы хабарлар окыйман онынъ акында. Атайым 1942-1947- нши йылларда 7-нши механизированный корпустынъ 63-нши бригадасы ман Венгрия, Чехословакия, Германия, Румыния, Болгария эллерин фашистлерден, Монголия, Китайды японлардан босаткан. «За отвагу», «За боевые заслуги», «За освобождение Чехословакии», «За победу над Германией», «За победу над Японией» деген медальлер мен савгаланган. Мен атайым ман оьктемсиймен.
Тезден курал айынынъ 9-ншы куьнинде биз Енъуьвдинъ мерекесин белгилеймиз. Сол енъуьвди меним уьйкен атайым Абдурахман Койлубаев баска аьскершилеримиз бен бирге савлай дуныяга аькелген.
Ильяс Койлубаев,
Уллы Аталык согысынынъ ветеранынынъ немереси.