«Патриотизм – ол тек Тувган Элге суьйимлик тувыл. Ол соннан да артык… Ол – тувган эл мен оьзинъ-
нинъ айырылмаслыгынъды сезуьв эм соны ман бирге онынъ наьсипли эм баьле-казалы куьнлерин де оны ман бирге оьткеруьв», – деп язган оьз заманында айтувлы совет язувшысы Алексей Толстой. Бу соьзлер бир шексиз буьгуьнлерде РФ Коршаланув министерствосы ман контрактлар туьзип, оьз ыхтыяры эм анъламы ман СВО ерине кететаган яслар эм эрлер акында айтылган. Тагы да бир уллы
язувшы Лев Толстой болса, оьзининъ «Война и мир» роман-эпопеясында Тувган Элди сондай авыр заманларда аьр дайым да коьзге коьп илинмеге суьймейтаган гражданлар, булай куьнлерде авызда аз айтылатаган эм яшавда аз бааланатаган халктынъ кесеги куткарып келген эм куткаратаганын аян белгилеп коьрсеткен.
Ногай районынынъ Терекли-Мектеб авылынынъ яшавшысы Оразбай Джумагельди увылы Дуйсенбиев халкка эм элге кыйынлы заманлар келгенде, буьгуьнлерде явга карсы элимиздинъ энъ де ийги яс йигитлери алды сырада турган, согыс спецоперациясы юритилип турган ерлерге оьз ыхтыяры ман кеткен.

Оразбай авылдасымыз Джумагельди эм Ембийке Дуйсенбиевлердинъ куллыкшы аьелинде тербия-
ланып оьскен. А.Джанибеков атындагы орта мектебти окып кутарган сонъ, 2 йыл узагында Германиядагы совет аьскер куьбинде эл алдында борышын толтырган. Аьскерден сонъ коьп йыллар Дагестан Республикасындагы РФ УФСБ-нынъ Кизлярдагы 3-нши боьлигинде куллык эткен. 2004-нши йылда ол кесек заманга оьз эрки мен Шешен Республикасы еринде ис борышты толтырмага кеткен.
Сол заман бу ол йыллардагы парахатсыз республикада намыслы кепте куллык эткени уьшин РФ Коршаланув министерствосы атыннан «Аьскершилик дослыкты беркитуьв уьшин», «Аьскершилик данъкы уьшин» медальдинъ 2-нши дережеси мен, «Аьскершилик куллыкты бек яхшы толтырганы уьшин» медальдинъ уьште дережелери мен, «Кавказда куллык эткени уьшин» коькирек белги мен,
согыс аьрекетининъ ветераны деген атпан савгаланган. Оннан баскалай, ога солай ок Россия иш ислер министерствосынынъ «Исти бек яхшы толтырганы уьшин» деген омырав белгиси де
тапшырылган. Оразбайдынъ кызынынъ айтувына коьре, атасынынъ патриотизми кайсы
заманларда да йогары оьлшемде болган. Ол аьр бир эр аьдем Тувган Элине кыйынлы заманларда оны тек куры соьз бен тувыл, коллары ман коршаламага керек деп санаган эм санайды.
Оьзи де патшалыгымызга авыр шакта соны душпаннан сакламага деп кетти.
Оразбай аьр юма сайын аьели мен кыска кепте хабарласпага заман табады. Буьгуьнлерде ол согыстынъ алды ягында юреди, россия аьскерлери бир айырым кесек ерди алган сонъ, тагы да алдыга токтавсыз барып турадылар.
Аталардынъ аьскершилик йоллары – увыллары ман уныкларына ийги коьрим. Аьлиги заманда Курск области мен Донецк Халк Республикасынынъ япсарында оьзининъ аьскершилик борышын Оразбай Дуйсенбиевтинъ увылы Алан да толтырады. Россия Аьскерининъ сырасына куллык этпеге кеткенше, ол Ставрополь каласында окып, программист кесписин алган. Янъыларда янъы аьскершилик исине де уьстинликли кепте уьйренди. Аланнынъ командирлери онынъ акында тербиялы, таза намыслы эм
аьскершилик антына алал аьдем деген ийги соьзлерин айтадылар.
«Аталыкты суьюв – ол оны аьр эскерген сайын оьз-оьзининъ коькирегине кагув тувыл, оны аьр йыгыл-
ган сайын тизлерине шоьккен ериннен йогары коьтеруьв…», – деп белгилеген язувшы Александр Вяземка. Россия тизлериннен буьгуьн коьтерилген. Сол коьтерилуьвди армаган бардырув
эм элди оьрленуьвдинъ янъы оьлшемине шыгарув керек болады. Сонынъ уьшин СВО-дынъ баьри борышларын да толтырмага эм соны Россия уьшин онъайлы аьллерде битируьв керегеди. Сондай ниет пен Тувган Элине атасы эм увылы Дуйсенбиевлер куллык этедилер. Сондай ниет пен буьгуьн элимиздинъ энъ де ийги яслары оьз Аталыгын коршалайдылар.
М.Ханов.
Суьвретлерде: Оразбай эм Алан Дуйсенбиевлер.