Янъыларда Аким Микиров ис йорыгы бойынша Кизляр районынынъ Сангиши авылында конакта болып кетти. Онда оьткен гражданлар сходында ерли инфраструктурадынъ оьрленуьви бойынша соравлары каралдылар. Шарада Кизляр муниципалитетининъ етекшиси Аким Микиров, онынъ орынбасары Мурад Багандов, администрациядынъ ер эм муьлк катнаслары бойынша етекшиси Ахмед Ахмедов, Кизляр районынынъ курылыс эм турак уьй эм коммуналлык хозяйство управлениесининъ етекшиси Гимран Магомедкеримов эм баскалар ортакшыладылар. Йыйыннынъ барысында балалар уьшин ойын эм футбол ойнав майданларынынъ курылысы, артезиан скважинадынъ капиталлык ярастырылувы бойынша соравлары каралдылар. Сол йыйында авыл яшавшылары уьшин энъ де оьткир маьселелердинъ бириси болган сув ман канагатлавга да айырым эс каратылды. Шарада аьлиги заманда аьрекетлейтаган артезиан скважинасы яшавшыларга токтавсыз таза сувды еткеруьвди канагатлар уьшин, оны тез аьрекетте ясамага кереги акында айтылды. Солай болып, авылды сув ман канагатлав соравы бойынша артезиан скважинадынъ сув йыйналатаган алатын да кесек заман ишинде ярастырмага деген карары да шыгарылды. Йыйыннынъ сонъында балалар уьшин ойын эм футбол майданларын курув бойынша проектлери яшавга шыгарылар уьшин, 2027-нши йылга курылыс планына сол объектлерин киргизуьвуьви мен байланыста, патшалык программаларында катнаспага аьризе бермеге деген карары да алынды. Район етекшиси Аким Микиров актуальли маьселелерин аянлав уьшин авыл яшавшылары ман сондай йолыгыслар озгарув эм биргелес токтасларын излев бек маьнели экенин белгилеп озды. Йыйыннынъ тамамында кенъесилген соравлардынъ аьр бирисин айырым карамага тийисли службаларына буйырыклар тапшырылды. 

Суьвретте: шарадан коьринис