Басы 16-ншы номерде
Олардынъ алдына колындагы мелте фонари мен койшы Нурманбет шыгады. Ол таныс койшыга болган аьл акында хабарлап билдирди эм колындагы Бидайхан Баймурзаевич Мавлимбердиевтинъ язган кагытын созып туткан. Кумлы авылыннан болган койшы, олардынъ келуьвининъ мырадын анълап, аькелген акт кагыты ман танысып, Аминат Муслимовнадынъ ойы ман макул болды. Соьйтип, авыл советининъ секретарининъ тиресуьвли эм каныгыслы аьрекети аркалы авылды сув ман канагатламага биринши трубалары аькелинди. Оннан сонъ авылга орталык трубадан орамларга тартпага деп, Кизлярда орынласкан межрайбазадан увак трубалар да аькелинди. Сол ак ниетли исинде совхоздынъ механизаторлары да, айтпага, Абибулла Абдунасов эм сондай баскалар оьз уьлисин костылар. Оннан сонъ авыл советининъ секретарине Сухокумсктан авылга сув тарттырувда уьш сварщиклер мен соьйлесип, оларды оьзине барып аькелмеге туьсти. Сол заманларда ол, авыл советининъ коьлигин айдавшы Махмуд Аджигайтаров пан барып, бир машина катран да аькелди. Катранды уьйкен казан ман кайнатып авыл яшавшылары туьрли савытлар ман аькетип, оьз орамындагы трубаларга ягып, онынъ кырыннан шуьберек пен эм тел мен ораганлар.
Ислер тамамланган сонъ, бас деп куьшли этип сувды йиберип трубаларды тазалап шыктылар, оннан сонъ кранларын салып басладылар. Аьр бир уьйдинъ алдында фонтан болып сув агып баслаганда, балалар шомылувда болдылар, уьйкенлер суьйинип бетлерин ювдылар. Авылдынъ яшавшыларына сол куьн уьйкен байрамга айланды. Аминат Муслимовна да, онынъ айтувы ман, кубыла бетке бетин бурып, юзин сыйпап, бу тапшырылган яваплы исти – авылга сув еткергенине, бетим ярыклы болды деп, бек куванган. Соьйтип, Кумлы авылга сув уьйкен кыйын салынып аькелинди.
Оннан бир аз заман кетип-кетпей, кыскаяклыды пленумга шакырдылар. Райком директоры Мурат Закирович авылда балалар бавы ашылаягы эм онда етекши этип оны алаягын билдирген. Не амал этсин, партия куллыкшысы болган сонъ, ога тапшырылган борышты толтырмай болмады. Ол оьзи тувган авылында сувды аьр бир уьйине еткерип калмай, янъы салынган балалар бавын да баьри керекли алатлар, муьлк, казан аяк, инвентарь эм сондай баска керекли затлар ман канагатлап, ашылувын уйгынлады, онда авыл балаларына завыклы балалыктынъ куьезин сезбеге де амал берди.
Бир йыл узагына балалар бавында куллык этип, Аминат Муслимовнады, 1975-нши йыл Тайрат Арсланова тийисли тыншаювга кеткеннен сонъ, онынъ орынына авыл советининъ председатели этип айырдылар. Яваплы кыскаяклыга артезиан сувын аьлиги Карасу авыл орамлары ман тартып аькелмеге де бакты буйырды. Сол йылларда Кумлы, Карасу эм Коммунист авыллары Адиль сельсоветине киретаган эди. Октябрь авылга трубаларын авыл председатели Коясыл авылыннан тасып аькелген. Авылда штаб Игам Аллабергеновтынъ уьйинде болган. Онда сварщиклер, куллыкшылар ас пан канагатланатаган эдилер. Баьри куллыклар
да биткеннен сонъ, авыл аьдемлери йыйылып, буровойдан Аминат Муслимовнадынъ сувды йиберип турган мезгилинде алынган суьврети онынъ халкы уьшин кыйын салганы акында оьмирге шайыт болып калаягына соьз йок. Солай болып, авыл советлери арасында юн, суьт, эт болдырув планын етимисли толтырувда базласып келгенлер. Ети авыл советлерининъ ишинде Кумлы авылы хозяйстволык азык-туьлиги бойынша планын артыгы ман уьстинликли толтырганы уьшин район сессияда кыскаяклыга савга да тапшырылган.
1955-нши йыл Кумлы авылга клуб етекшиси болып келген ногай яс Юнус Кожаев пен танысып, эки яс аьел курадылар. Сол аьелде бес аьвлетлери тувып оьскен. Эки увыллары дуныядан кештилер. Замир увылы – тийисли тыншаювда, буьгуьнлерде Карасу авылында аьели мен турады. Эки кызлары Замира эм Эльмира оьз ислери бойынша халкына, элине пайдалы болып келедилер. Онынъ суьйген уныклары эм йиенлери ясуьйкенди оьз исиндеги, окувдагы етимислери мен куьезлендирмеге, коьнъилине етпеге шалысадылар. Сыйлы ис ветераннынъ авылы оьрленуьвге эткен кыйыны босына кетпеди, эли мен де билинмей калмады, ол туьрли Сый грамоталары, разылык хатлары, дипломлары, туьрли савгалары ман белгиленген.
Сыйлы ясуьйкеннинъ, баьтир кыскаяклыдынъ оьткен бай сулыбы, авыл тарихинде калдырган коьримли ызы, халкы уьшин каьрлеген ис йолы коьплеген несиллерге ярык уьлги болып келеди.
Курал айынынъ 9-ншы куьнинде ис ветеранымыз оьзининъ 90 йыллык мерекесин хош алды. Аминат Муслимовнады сыйлы мерекеси мен ак юректен кутлай келип, ога берк ден савлык, узак оьмир, таьвесилмес яшав кайратлыгын, йылувлыгын, ток коьнъилди, йогарында таза эм ашык коькти йораймыз.
Г.Нурдинова.
Суьвретте: ис ветераны Аминат Кожаева оьз аьрекетинде.