Ата-бабаларымыздан калган эски соьзлердинъ маьнелери айлак уьйкен. Солар бир неше оьмирлер артта айтылган болса да, бу куьнлерде де акыйкатлыгын коьрмей болмаймыз. Ийги айтылган соьзлерден: Авылдасынъ ким – аданасынъ сол. Элбетте, кайсы баславынъды да биринши болып ким
биледи? Оьзек те, авылдасынъ, яхшылык, яманлык бола калса, биринши болып, ол ювырып келеди. Ислам дини бойынша да авылдаска уьйкен орын бериледи, ахиретте де авылдас пан байланыслы сорав болаяк деген ой да билдириледи.
Мен Ногай районымыздынъ уьйкен болмаган авылларынынъ бириси – Таьтли булакта яшайман. Мунда баьри де бир-бирисин бек аьруьв таныйдылар, коьп затларымыз бан да боьлисемиз. Энъ де ювык болып, кишкей яде уьйкен авылда яшасанъ да, авылдасынъ саналады.
Бу куьнлерде меним конъысым Гульфира Аджатаева оьзининъ мерекесин белгилейди. Сондай ийги куьнинде онынъ янында тек ювык аьдемлери болып калмайды, биз де авылдасымыз бан сол куьезди боьлисемиз.
Биз Гульфира ман коьп йыллар узагында бир орамда татымлыкта яшаймыз, сога коьре, бизим дослыгымыз да, катнасувымыз да йыллар ман сыналган деп айтпага да болады. Ол – Таьтли булак авылына тетеси мен келип, яшап калган аьдем. Мунда онынъ бала шагы, кызыклы оьспир заманы да, бу куьнлерде эсли яшав вакыты да оьтип барады.
Гульфирадынъ сав яшав оьмири кыр куллыклар ман байланыслы болып келеди. Ол яслай орманлык хозяйствосында ислеп баслаган. Ис йыллары ишинде тек ийги тамамларды коьрсетип, бир неше кере белгилевге де туьскен. Бу куьнлерде онынъ уьй архивинде белсенли аьрекети уьшин бир неше Сый грамоталарды да коьрмеге болады.
Гульфира авылымыздынъ яшавшысы Савкат Аджатаев пен бактысын байланыстырып, бес аьвлетти де асырапоьстирдилер. Бу куьнлерде балалары – аьр кайсысы да оьз аьеллерин курып, яшавда орынларын тапканлар. Кайсы байрам куьнинде де уныклар ясуьйкенди кутлайдылар, оьзлерининъ конак болып
келуьвлери мен суьйинтедилер.
Гульфира-авылдасымнынъ касиети де сондай, ол оьзине кайсы ястагы аьдемди де тартады: бек бавырмалы танъ кыскаяклы, коьнъилинъди де авлап, маслагатын да берип, сени тынълап та болады.
Бу куьнлерге дейим бир-биримиз бен не затымыз бан да боьлискенмиз, алдыда да сол ийги аьдетлеримизди тутаягымызга шек йок.
Мерекели куьнинде Гульфирага ден савлыкты, балаларынынъ куьезлерин, уныкларынынъ завыклы сеслерин эситип турганды йорайман. Яшав йолынъда шуваклы куьнлер мол болсын, Гульфира!
Г.Янгазиева.
Калинин авылы.
Суьвретте: Г.Аджатаева.
