Ногай район администрациясында тезден болаяк сайлавларга аьзирлик коьруьв соравларына багысланып, ДР-нынъ «Ногайский район» МР-нынъ ТИК председатели Расул Батырханович Боранбаевтинъ басшылыгы астында ис кенъеси озгарылды. Онда «Ногайский район» МР администрация аькимбасынынъ орынбасары Мурат Шадиев, Дагестан Республикасы бойынша Россия УФСБ 3-нши боьлигининъ (Кизляр каласы) начальниги Шамиль Баранбаев, Ногай районы бойынша Россия МВД полиция боьлигининъ начальнигининъ орынбасары Артур Алимпашаевич Суюндиков, Южно-Сухокумск, Ногай эм Тарумов районлары бойынша от туьсуьвден куткарув гарнизонынынъ (МЧС) начальниги Мурат Назимович Камилов ортакшылык эттилер. Комиссия ваькиллери мен кавыфсызлык соравлары бойынша семинар оьткерилип, аьр етекши оьз ягыннан (ис борышларына коьре) коьрилеек шараларга маьне берди. УФСБ начальниги Шамиль Баранбаев ыхтыярга карсы аьрекеттинъ алдын шалув эм сайлавлар исинде аьрекет этетаган объектлердинъ терроризмге карсы коршаланувын канагатлав бойынша шараларга эс каратты. Полиция боьлигининъ начальнигининъ орынбасары Артур Суюндиков сайлавлар оьтуьвде полициядынъ сайлав комиссиялары ман биргелес аьрекетлеви, инцидентлерге эс каратув йорыгы эм участокларда ямагат йорыгын канагатлав бойынша соьзин айтты. От туьсуьвкуткарув гарнизоннынъ начальниги Мурат Камилов от туьсуьвге карсы кавыфсызлык соравларын, аьллерден тыскары вакытта эвакуация йорыгы эм этилмеге керек аьрекет акында соравларда токталды, солай ок оперативлик аьлде МЧС-тынъ куьшлерининъ эм амалларынынъ эс каратувын тергеди. Йолыгыс барысында онынъ катнасувшылары куьш ведомстволардынъ эм власть органларынынъ аьрекетлевининъ онъланув соравлары тешкеруьвли каралдылар, солай ок орын таппага болаяк бузувлардынъ алдын шалув бойынша шаралар ойласылды. Кенъес сырагылары бойынша баьри уйгынлав аьллерди ойласып белгилев уьшин яваплылы аьдемлерге аян тапшырмалар берилди.