Янъыларда Ногай район социаллык куллыкшылары оьз кеспи байрамын белгиледилер. Танълыгын аямай савкатлайтаганлар уьшин ян йылувлыкка эм коьнъил коьтерилиске толган шара «Абдулла» банкет залында оьтти. Мунда социаллык куллыкшыларын кутламага «Аталыкты коршалавшылар» патшалык фондынынъ филиалынынъ етекшисининъ орынбасары Рамиз Магомедов, Ногай рай-
он аькимбасынынъ орынбасары Рашид Шангереев, ДР Ямагат палатасынынъ агзасы, район Хатын-кызлар советининъ председатели Асият Манкаева, Кумлы авыл етекшиси Сакинат Елманбетова, Терекли-Мектеб авыл аькимбасы Марат Кулунчаков, Куьнбатар авыл аькимбасы Замид Яриков эм коьп баскалар келдилер.
Биринши болып конакларды Социаллык яктан яшавшыларды канагатлав орталыгынынъ
етекшиси Хамидулла Саитов эм Яшавшыларды социаллык яктан коршалав управлениесининъ
етекшиси Багавдин Тангатаров хошладылар эм шатлык иелерине йылы йоравларын ман разылык соьзлерин айттылар. Шара барысында баьри йогарыда белгиленген конаклар социаллык
куллыкшыларынынъ исининъ маьнелигин белгилеп, оларга таьвесилмес куьш эм наьсип йорадылар. Сонъ КЦСОН етекшисининъ орынбасары Зарема Шувакова, боьлик заведующийлери Марзиет Картакаева, Менлихан Картакаева, Зарема Оразбаева, Альбина Агисова, Мухминат Ярикова, КЦСОН профкомынынъ председатели Джамиля Халилова шыгып ис йолдасларын кутладылар. ДР Халк
Йыйынынынъ Депутаты Мурзадин Авезов атыннан кутлавды Зарема Шувакова окыды.
Шарадынъ оьзеги, энъ де ийги кезеги – шатлык иелерине Сый грамоталар тапшырув болды. Бу куьн олар ДР Ис эм социаллык яктан оьрленуьв министерствосыннан, Ногай район администрациясыннан, Терекли-Мектеб авыл администрациясыннан, солай ок КЦСОН эм УСЗН етекшилевиннен грамоталар ман савгаландылар. Эткен исти баалав, сонынъ уьшин разылыгын билдируьв, элбетте, аьруьв куллык. Соьзсиз, бу ийги байрам социаллык куллыкшылардынъ синде коьпке дейим сакланар эм коьтерилген коьнъил етимисли иске даьвлендирер.
Н.Кожаева,
РФ Журналистлер союзынынъ агзасы.
Суьвретте: савгалав мезгили.