Тек туьнегуьнлерде савлай дуныя Уллы Аталык согысувда алган енъуьвдинъ 80 йыллыгын белгиледи. Бизим данъклы коршалавшыларымыз бу киели байрамды согысув ерлеринде карсы алдылар. Солардынъ ишинде – бизим ердесимиз, Терекли-Мектеб авылынынъ яшавшысы Алиян Маутали увылы Шамбилов. Оьз тенълериндей болып, Алиян мектебти биткен сонъ (яс Кадрия атындагы мектебте окыган) сырт калаларга ислемеге кеткен – баслап Сургутка, сонъ Норильск каласына.
Аталыгымыз кыйынлы аьллерге туьскенде, Алиян СВО ерине согыспага кетеди. Ол оьз эрки мен «Каспий» батальонынынъ «Барс-34» сырасында 6 ай узагында куллык эткен, сонъында Россия Федерациясынынъ Коршалав министерствосы ман контракт туьзип, аьлиги заманда Донецк областинде явды урып турады. Алиян Шамбилов минометлык батареясынынъ мотострелковый бригадасында наводчик куллыгын юритеди.
Алиянды мен бала заманнан алып таныйман, коьп соьйлемейтаган оьзден яс. Аьли де оьзи акында коьп соьзлер айтпайды. Онынъ баьтирлиги акында бирге СВО еринде согыскан йолдаслары айтадылар. Оьз согыс борышларын аьскерши яваплылык пан коркынышсыз толтырады. Биз коршалавшыларымыз бан оьктемсиймиз, олар бек кыйынлы аьллерде енъуьвди ювыклатадылар.
Алиян Шамбилов Россия Федерациясынынъ кызыксынувларын коршалавга каратылган специальли борышларын уьстинликли толтырганы уьшин Дагестан Республикасынынъ Аькимбасы Сергей Меликовтынъ атыннан Разылык хатка тийисли болган. Биз шекленмеймиз, келеекте йигерли яс йогары патшалык баргылар ман савгаланар деп.
– Оьз элине алаллык эм Аталыкка суьйим – аьр бир патшалыктынъ маьнели принциплери. Сол сезимлер кайзаманда да оьткир болган эм Уллы Аталык согысында енъуьвдинъ негизи деп белгиленеди. Биз оьз ата-бабаларымыздынъ йигитлигине тийисли болмага шалысамыз. Биз медальлер, орденлер алайык деп согыспаймыз, баьри куьшимиз – Енъуьвге, – деп айтады Алиян. Сол шынты патриоттынъ, эр кисидинъ соьзи.
Баьри аьскершилеримиз де уьйге аман кайтсынлар. Заман йигерли, куьшли дегенлерди сайлады. Сога коьре, енъуьв бизики болар деп бир де шекленмеймиз.
Г.Бекмуратова,
Россия Журналистлер союзынынъ агзасы.
Суьвретте: А.Шамбилов.