Ногай район администрациясынынъ кезекли аппарат йыйынында согыс спецоперациясынынъ катнасувшыларынынъ эм соннан кайтып келген СВО катнасувшыларынынъ аьеллерин колтыклав бойынша шараларды яшавга шыгарув манбайланыслы соравлар ойласылды.
Белгиленген сорав ман бас деп Ногай район администрациясынынъ «Яслык» яслар орталыгынынъ МКУ
етекшиси Абибулла Шамбилов шыгып соьйледи. Онынъ айтувы ман, буьгуьнлерде Ногай районыннан СВО-да катнасатаганлар саны 278 аьдем болады, солардынъ арасында 49 аьдем ян берген деп саналады.
Район администрациясы РФ эм ДР Оькиметлерининъ тапшырувлары ман байланыста СВО катнасувшыларынынъ эм соннан кайтып келгенлердинъ аьеллерин колтыклав эм коьмек этуьв ягыннан ярдам этеди.
Айтпага, олардынъ балаларын районнынъ билимлендируьв учреждениелерине ерлестируьв, оларды исси ас
пан канагатлав, тегин медицина, социаллык эм психологиялык ярдамларын этуьв бойынша. Район аькимбасынынъ токтасы ман СВО катнасувшыларына ер участокларын беруьв акында положениелер кабыл этилинген.
Буьгуьнлерге СВО катнасувшыларына 83 ер участоклары берилген. Сондай положениелер районнынъ баьри де авыл муниципаллык образованиелеринде кабыл этилинип алынган. Оьткерилетаган куллыклар акында
хабарлар коьлем информация амалларында, интернет ресурсларынынъ бетлеринде эм Ногай район администрациясынынъ официаллык сайтында орын табадылар.
Ойласувга шыгарылган сорав ман байланыста Ногай районынынъ КЦСОН коллективи юритетатаган
куллыклар акында КЦСОН етекшиси Хамидулла Саитов шыгып соьйледи. Онынъ соьзине коьре, КЦСОН куллыкшылары СВО катнасувшыларынынъ аьеллерине социал-психологиялык, медициналык эм уьйшилик
аьллериндеги коьмеклерин этедилер. Туьрли оьлшемли соравларды шешуьв ниет пен аьр бир СВО катнасувшысына социаллык кураторы беркитилген. Кураторлар ян берген аьскершилердинъ,
мобилизация этилингенлердинъ, оьз эрки мен СВО-га кеткенлердинъ эм оьзгелердинъ бас социаллык маьселелерин эм керексинуьвлерин белгилев мырад пан социаллык паспортларын туьзетуьв бойынша ислер
юритедилер. (Доклад толы кебинде газетамыздынъ кезекли номеринде баспаланаяк).
СВО катнасувшыларына эм олардынъ аьеллерине тийисли льготалар эм тоьлевлер акында Ногай районындагы ДР ГКУ УСЗН директоры Багавдин Тангатаров хабарлады. Онынъ белгилеви мен, ДР Оькиметининъ 2023-нши йылдынъ 31-нши май айындагы 201- нши номерли токтасы ман келисли аьлде РФ Коршаланув министерствосы ман контракт туьзгенде быйыл районнынъ 3 яшавшыларына, СВО катнасувшыларына: 100 мынъ маьнет акша – Арсен Янгишиевке (Росгвардия), 300 мынъ маьнет – Сейфидин Айтугановка («Каспий» отряды), 500 мынъ маьнет – аьскершиконтрактник Иса Нурманбетовка тоьленген. Тап сондай тоьлевлерди 2022-нши йылда районнан 32, 2023-нши йылда – 15, 2024-нши йылда – 19, 2025-нши йылда – 17 аьдем алганлар.
Быйылдынъ 1-нши июнине район еринде баьриси 19 СВО катнасувшылары яшайдылар. ДР Оькиметининъ тийисли токтасына коьре, СВО-дан кайтып келген сонынъ катнасувшылары ман 5 социаллык контрактлары туьзилген (докладтынъ иштелиги мен газетамыздынъ ювыктагы номерлеринде таныспага боларсыз).
Ногай районынынъ яшавшыларын социаллык ягыннан коршалав фондынынъ ис аьрекетининъ сырагылары ман йыйылганларды сонынъ директоры Кайтархан Отегенова таныстырды. «Фондтынъ эсабына 2022-нши йылда СВО катнасувшыларына ярдамга деп 1 миллион 126 мынъ 547 маьнет акша туьскен. СВО катнасувшыларына эм аьеллерине коьмекке 416 924 маьнет шыктаж этилинген. 2023-нши йылда 358 796
маьнет шыгарылган, 2024- нши йылда – 299 599 маьнет эм оьткен 2025-нши йылда – 1 184 792 маьнет. Быйылдынъ басына Фондта эндигиси 799 367 маьнет акша калган.
Район администрациясынынъ кенъеслеринде СВО катнасувшыларына колдан келген коьмек этуьв кереги
акында бир неше кере сорав коьтерилген. Сырагысында аьр квартал сайын бир куьнлик кыйын акты район
социаллык фондына СВО катнасувшыларына ярдамга деп йиберуьв акында карар да алынган», – деди СЗН
Фондынынъ директоры.
Кенъесте СВО катнасувшыларына эм олардынъ аьеллерине ярдамга районнынъ социаллык фондына
карыжларды иркуьвсиз йиберуьвди баьри де авыл аькимбаслары, организациялар эм учреждениелер басшылары эслеринде тутпага кереги акында карар алынды.
М.Ханов.