РФ Президенти Владимир Путиннинъ Указы ман Дагестан Республикасынынъ Аькимбасынынъ исин юритуьвши этип беркитилген Федор Вячеславович Щукиннинъ ис аьрекетин баславы Уллы Енъуьв байрамынынъ белгиленуьви мен рас келди. Ол Уллы Аталык согысынынъ ветеранларын кутлап, (регионда сав эсен яшайтаганлар саны – уьшев: Муса Багаудинов, Валентина Оверина, Юрий Петрухин) Юрий Петрухин мен уьйине барып, йолыгысты.
Федор Щукин ветеранга ден савлыкты йорап, оькимет яктан ога коьмек болаягы акында билдирди. Оннан сонъ юмады ДР Аькимбасынынъ исин бардырувга кесек заманга беркитилген Федор Щукин «Время героев» программасынынъ дагестанлыкатнасувшылары ман йолыгыстан баслады.
Оны ман йолыгыска Россия Баьтирлери Темирлан Абуталимов пан Энвер Набиев, Йигитлик орденининъ толы кавалери Магомед Валихов келдилер.
Солардынъ экеви аьли уьшин ис орынларга да беркитилдилер: Темирлан Абуталимов – ДР дин ислери эм миллет политикасы бойынша министрининъ орынбасары, Магомед Валихов – савлык саклав бойынша министрдинъ орынбасары.
– Мага сиз бен, бизим баьтирлер мен танысув уьйкен сый.
Сизинъ аьр биринъиз – ортак ямагат ойдынъ эм оьзинъиздинъ фронт йолдасларынъыз ишинде алдында. Сонынъ уьшин сизинъ ойынъыз да республикады оьрлендируьвде алды орында болаяк, – деди ДР Аькимбасынынъ исин юритуьвши Ф.Щукин.
Онынъ ойына коьре, согыс спецоперациясы битип, енъуьв мен уьйге кайткан аьскершилердинъ сулыбын, патриотлык сапатларын кулланув керек болады.
Солай ок, оларды ерли самоуправлениеде – район, авыл дережесинде, Уллы Аталык согысыннан сонъ ветеранлардынъ сулыбын куллангандай этип, экономикады коьтеруьвде кулланув керек.
– Аьли уьшин маьнели – аьскершилердинъ тувган аталыгына сав эсен кайтувы. Олар бизге мунда да бек кереклер. Биз болсак, оларга оьз коьмегимизди этермиз: оьзлерин таппага, ис орынга ерлестирип, патшалыгымызга пайдалы экенлерин коьрсетпеге шалысармыз.
Бу куьнги йолыгыста Федор Щукин «Время героев» программасынынъ катнасувшыларына регионды оьрлендируьв бойынша бар ойларын билдирмеге тилек салды.
Ийги кадрлар экономикады оьрлендируьвде, патшалык эм муниципаллык службаларда бек керегин де белгиледи.