Август айынынь 28-нши куьниннен алып сентябрь айынынъ 4-нши куьнине дейим Мордовия Республикасында спорттынъ бокс кеби бойынша оьткен чемпионатында Россия боксынынъ белгили ваькиллери конакта болып кеттилер. Солардынъ бириси бокс бойынша Олимпиада чемпионы Альберт Батыргазиев эди.
Белгили спортсмен Альберт Батыргазиев Бабаюрт районынынъ Геметюбе авылында тувган. Ол – Россиядынъ бокс бойынша доьрт кере чемпионы. 2021-нши йылдынъ август айынынъ 5-нши куьнинде 57 килограмм шеккиси мен ногай яс спорттынъ бокс кеби бойынша Токио каласында озган XXXII язгы Олимпиадасында чемпион атын тийисли казанган. Сол маьнели спорт шарадынъ финал кезегинде ол америка спортсмени Дюк Рэганды енъген. Мордовия Республикадынъ Мусулманлар дин управлениесининъ председатели, муфтий шейх Раиль-хазрат Асаиновтынъ шакырувы ман Альберт Батыргазиев, Абдул-Вахед Ниязовтынъ етекшилеви астында спортсменлер эм ямагат аьрекетшилери мен бирге, Белозерье авылында конакта болып, «Джума» межигитинде авыл яслары эм ясуьйкенлери мен йолыгысты. Онда Альберт оьзининъ етимисли спорт йолы, етискен уьстинликлери, алдыдагы ой-мыратлары акында хабарлап эситтирди. Белгили спортсменнинъ соьзине коьре, дин ястынъ яшавында онынъ алдыга барувында эм авырлыкларды оьтуьвинде бас негиз эм уьйкен анъ-акыл диреги болып, маьнели орынды тутып келеди. Баска болып, ногай яс татарлардынъ, боьтен де, Белозерье яшавшыларынынъ аьдетли конаксуьерлигин айырым белгилеп озды.
– Яслар уьйкен кызыксынув ман олимпиада чемпионын тынъладылар. Дагестан авылыннан келген ногай ястынъ коьрими йолыгыска йыйылган окувшыларды коьнъиллендиреегине бек сенемен. Альберт пен кенъескенде, йыйылганлар, спорт тармагында коьплеген етимислерин эм сыйлы атларын казанувына да карамастан, чемпион яс бек танъ эм оьктемсимейтаган аьдем экенин сезбей болмадылар. Боьтен де, ол йыйылганлар ман татар тилинде соьйлегени, бизди бек коьнъиллендирди, – деп белгилейди муфтийдинъ орынбасары имам-мухтасиб Рашит-хазрат Абдрашитов.
Соьйтип, шара йылы эм йогары коьнъилде оьтти.
Суьвретте: йолыгыстан коьринис.