Бала баьримизге де ортак. Кашан да, саьбийлеримиз уьстинликлерге етисип, бизди суьйинтип турса экен деп ойлаймыз. Мыратлары толсын деп куьн сайын тилек саламыз. Соьйтип, оьзининъ тувган-кардашларына, ата-анасына Айсель Исакаевадынъ етимислери – куьез эм оьктемлик. Айсельдинъ куьлкиси кайдай ярасык, таза. Сол куьлемсирев дайым да онынъ юзинде яйнасын деп сагынаман ога. Айсель Ессентуки каласында яшайды, Губкин атындагы 5-нши мектебинде 7-нши класста окыйды. Калада окыган балалардынъ оьз оьнерлерин оьрлендирмеге амаллар коьп деп ойлайман. Соьйтип, Айсель «Дружба народов» кавказ биювининъ ансамблининъ солисткасы болып, туьрли конкурсларда, фестивальлерде катнасып, ийги биюв коьрсетеди, баргылы орынларга тийисли болады. Озган айдынъ ишинде бу ансамбль Янис Поповтынъ етекшилеви астында Ставрополь каласында «Кавказиада» деп аталган кавказ биювлери бойынша Россиядынъ Бириншилигинде катнасты. Ансамбль шешен яслар «Нохчий хелхар» биювин, «Казбегури» грузин тав биювин, «Авар оьрнеклери» дагестан кызлар биювин коьрсеттилер. Бу ерде айтып озбага керек, ызгы айтылган биювде туьрли яслы 70 артистлер бирден сахнага шыкканлар, биревлер биринши кере шыкса да, бек ийги биюв коьрсеткенлер. Жюри бу биювди энъ де ийги деп белгиледилер. Айсель Исакаева да биринши кере шыкты сол биювде ортага, тек бир йылдынъ артында ол биюв студиясында биринши абытларын эткен эди, болса да оьзининъ куллык- суьерлиги мен, оьнери мен ансамбльде оьз орынын алды. Сол оьнер коллективине баргылы орынлар алмага амал берди деп айтпага боламыз.
Бу Бириншиликте етискен уьстинликлерине коьре, «Дружба народов» кавказ биювининъ ансамбли Москва каласында Патшалык Кремлевский Дворецинде сахнага шыкпага тийисли болды. Сонда йогары зейинлик коьрсетип, биринши орынды алды. Мен ойлайман, бу енъуьвде кишкей кызымыз Айсель Исакаевадынъ да эткен уьлиси уьйкен. Мен ак юректен Айсельди, оны ман бирге баьри Исакаевлердинъ аьелин сондай суьйиниш пен кутлайман.
Келеекте Айсель коьшируьвши болмага суьеди. Сол мырады толсын деп йорайман. Бийикликке ымтылып, оьз оьнерин оьстирип турган кызалактынъ енъуьвлери акында аьли де эситермиз деп уьмит этемиз.
Г.Бекмуратова.
Суьвретте: Айсель Исакаева ансамбль етекшиси мен.