Буьгуьнлерде окув, маданият, саният ошаклары, туьрли ямагат организациялары ман яс аркалар арасында ана тилин саклав, ногай халк маданиятын, тарихин оьрлендируьв бойынша туьрли шаралар озгарылып, заьлимдей куллыклар юритиледи. Янъыларда, айтпага, элимиздинъ бас каласы Москвадынъ «Дар» маданият орталыгында «Казыят» Саваплык фондынынъ эм «Ногай ямагаты» регионаллык ямагат организациясынынъ бирге уйгынлавы ман калада окыйтаган ногай миллетли студентлерининъ йолыгысы да йогары коьнъилде озгарылды. Шарады Руслан Янполов юритти. Сол «Оьз ойыны» деген интеллектуальлик квиз-ойынына йыйылган ногай студентлер, айтпага, оьз миллетининъ тарихи, маданияты, дини эм ана тили темалары бойынша оьз билим оьлшемлери мен сынасып, аьр бир соравга явапларында тапкырлыгын, ойларынынъ теренлигин, халк асабалыгына уьйкен суьйимлерин ашык коьрсеттилер. Билимлер теренлигин шайытлайтаган ойыны кызувлы, куьндеслик, кызыклы кенъесуьв аьлинде оьтуьви мен, ногайлар туратаган туьрли ерлерден келип Москва каласында билим алатаган студентлери бир-бириси мен ювык танысып, оьз заманларын пайдалы озгарып, олардынъ аралык байланысын, дослык эм татымлык коьпирин беркитпеге, юреклеринде халкы уьшин оьктемлик сезимлерин тувдырмага оьз амалын берди. Студентлердинъ йолыгысынынъ тамамында билимлерин коьрсетуьвде айырым баскаланган катнасувшыларына, енъуьвшилерине шара уйгынлавшылары атыннан эстеликли баргылар, Сый грамоталар тапшырылдылар. Аьр бир ойын катнасувшысына сол кызыклы шарада тек ортакшылык эткен куьн болып калмай, оьз халкынынъ бай маданияты, тарихи, ана тили бойынша кызыксынувын оьстирип, ата-бабаларыннан калган асабалыгына суьйимининъ тамырын юреклеринде теренлеткен куьн болып та эслеринде сакланар. Сол тувган ана тилимиздинъ оьрлендирилуьвине, халкымыздынъ тарихин, маданиятын саклавга каратылган билимлендируьв шара келеекте де иркилмей бардырылып, халкынынъ келеектегиси уьшин коркпай, яс несилди халкынынъ шынты патриотлары болып оьспеге шакырув болаягына сенемиз.

Г. Нурдинова. Суьвретте: шарадан коьринис.