Биринши окытувшы… Аьр кимнинъ юрегинде ол уьйкен орынды бийлейди. Кишкей саьбийлерден билимли аьдемлер оьссин деп, биринши окытувшы не шаклы куьшин эм янын береди. Куьннен-куьнге эм йылдан-йылга ол оьзин савлайын балаларга багыслайды. Ол окувшысынынъ кишкей уьстинлигине де суьйинеди эм аьр биревге уьстинликке етиспеге аьллер туьзбеге шалысады.
Оьз окувшыларынынъ ойларында эм эткен ислеринде, биринши енъуьвлеринде яшайды демеге болады Нариман авыл орта мектебининъ баслангыш класслар окытувшысы Зульфия Арсланбековна Матиева акында. Ол кишкей заманнан алып, оьз исин балалар ман, билим беруьв мен байланыстырмага мырат эткен. Сол узак йылларда онынъ юрегинде окытувшылык кесписине тувган суьйими йылдан-йылга оьсе беретаганын бизге оьзи де айтады.
Болаяк окытувшы З.Батыр- мурзаев атындагы Хасавюрт педучилищесининъ Терекли-Мектеб авылындагы филиалында окыган, сонъ Махачкалада Дагестан педагогикалык университетинде билимин оьстирген. Ис аьрекетин Сургут каласындагы балалар бавында баслаган, окытувшы кесписи мен яшавын 2016-ншы йыл байланыстырган. Саьбийлерге билимлер дуныясына йол ашып баслаганлы тек 9 йыл болса да, Зульфия Арсланбековнадынъ ис усталыгы эм сулыбы акында айтпага болады. Ол аьр бир баладынъ янында ясырынган амалларын аянлап, яшавга шыгармага ярдам этеди. Онынъ окувшылары туьрли мектеб конкурсларда катнасадылар, солай ок орыс тили бойынша Халклар ара «Лисенок» эм «Мир русского слова» онлайн олимпиадаларында, Халклар ара «Юный гений» онлайн конкурсында катнасып, бир неше окувшылары 1-нши дережели дипломлар ман савгаланганлар. Окытувшы оьзи де туьрли конкурсларда катнасып, баргылы орынларды бийлеген, айтпага, Билимлендируьв куллыкшыларынынъ кеспи усталыгынынъ «Таланты России» Савлайроссиялык фестивалинде енъуьвши болган. «Дагестан Республикасынынъ Йыл окытувшысы-2024» республикалык конкурсынынъ район кезегинде 1-нши орынды казанган. Уллы Енъуьвдинъ 80 йыллыгына багысланган «Самый классный классный» республикалык конкурсынынъ район кезегининъ савгашысы болган. Зульфия Матиевадынъ ийги иси Ногай район администрациясынынъ Сый грамотасы ман белгиленген.
21-нши оьмирдинъ окытувшысына керекли баьри касиетлерди Зульфия Матиевада таппага болады. Ол дайым оьз билимин оьстируьв уьстинде ислейди, ата-аналар ман байланыс тутады, уьйкен эс этеди патриотлык тербиялавга. Аьр бир окушысынынъ юрегине сокпак туьзип болады яс окытувшы, ол саьбийлерди йигерлендирип, оьз куьшине сендирип уьйретеди. Уьйкен яны авырувы ман Зульфия Арсланбековна Терекли-Мектеб авылында Хасавюрт педучилищесининъ филиалынынъ ябылувы акында айтады.
– Терекли-Мектеб авылындагы педучилищеде йогары кеспи усталыгы болган, сулыплы окытувшылардынъ колында окыганмыз. Сол окув ошагыннан шыккан выпускниклер бу куьнлерде тек бизим районда тувыл, онынъ тысында да яс несилге билим беруьв эм тербиялав исин бардырадылар. Танълагысы куьн акында бек кыйналаман, яслар сырасында окытувшы болмага суьйген аьдемлер айлак аз, йокка эсап демеге де болады. Дуныяда энъ де сыйлы – окытувшы кесписин бизим яслар сайласын деп, онъайлыклар туьзилсе экен, – деп оьз ойы ман боьлиседи Зульфия Арсланбековна.
Окытувшыдынъ кесписиннен керекли эм маьнели кеспи йок, ол баскалардынъ баьрине де йол коьрсетеди.
Н.Кожаева.
Суьвретте: З.Матиева.