Уьстимиздеги 2026-ншы йылдынъ сары тамбыз айынынъ 15-нши куьнинде Коясыл авылыннан согыс спецоперация еринде катнасатаган аьскершилерге кезекли 82-нши кере гуманитарлык юги йиберилди. Сол ярдам Ставрополь крайынынъ «Бирлик – Единство» волонтерлык куьбининъ эм куьнтувар районларынынъ дин аьрекетшилерининъ белсенли катнасувлары аркалы уйгынланган. Гуманитарлык юги 205-нши айырым гвардиялык мотострелковый казаклар бригададынъ Херсон еринде согыс борышын толтыратаган аьскершилерине йиберилди. Волонтерлар ман аьскершилерге явдан ясырынмага ярдамласатаган йырма бес шилтерлери, ярым тонна ишетаган сув куйылган сисе савытлар сатылып алынып аьзирленген эдилер. Аьзирленген юкти кеплев эм оны йиберуьв исинде Ставрополь крайы бойынша муфтийининъ биринши орынбасары, крайдынъ мусылманлар дин управлениесининъ президиумынынъ агзасы Фаизрахман-Хаджи Ямухаметович Эсенов Нефтекум муниципаллык округы бойынша дин аьрекетшилери мен бирге ортакшыладылар. Саваплык исине Степнов районынынъ эм Иргаклы авылынынъ яшавшылары имам Зинулла Магомедович Амангазиевтинъ етекшилиги мен оьз косымын эттилер. Дин аьрекетшилердинъ биргелес куьши мен, аьскершилерге бир согыс юрген ерден баска ерге коьшип орынласувга эм оны беркитуьв уьшин курылыс алатлары йиберилдилер. Гуманитарлык югин еткеруьвин уйгынлавда Зинур Джантемиров та уьйкен ярдамын этти. Ол коьмекти еткеруьв уьшин оьз КАМАЗ коьлигин берди эм оьзи де ярдамласпага келген аьскершилер мен бирге СВО юрген ерге йолланды. Уйгынлавшылар юкти тиевде эткен ярдамы уьшин Мурат Заракаевке айырым разылыгын билдиредилер. Боьтен де юк йиберилуьв шагында эки окувшыдынъ эткен коьримли иси йыйылганлардынъ коьнъиллерин йылытты. Оьз куллыклары ман шыккан эки окувшылар, уьйкенлер гуманитарлык юкти коьликке тиеятырганын коьрип, оларга янасып ярдамын эттилер. Волонтерлар олардынъ атааналарына, оьз балаларында куллыксуьерлик, тоьгерегиндегилерге ярдамласпага аьзир болувды тербиялаганлары уьшин, айырым разылыгын билдирдилер. Аьр бир гуманитарлык ярдамы коьплеген янлары авырыган аьдемлердинъ кыйын салувы ман йибериледи, айтпага, биревлер шилтерлер аьзирлейдилер, керекли алатларын, кийимлерин аладылар, баскалар юкти тиемеге, коьлик пен канагатламага, юкти еткеруьвди уйгынламага коьмегин этедилер. Ставрополь крайынынъ мусылманлар дин управлениеси гуманитарлык югин кеплевде эм йиберуьвде катнаскан дин ваькиллерине, волонтерларга, саваплык этуьвшилерге, крайдынъ яшавшыларына уьйкен разылыгын билдиреди. Ийги ислер, аралык коьтергишлев, ярдамга келмеге аьзир болув – тек аьдемлерди бирлестирип калмай, буьгуьнлерде коьмек керексинетаганлар алдында ортак яваплылыктынъ шайытлавы да болып келеди. Суьвретте: гуманитарлык ярдамы йиберилуьв мезгили.