Ногай районынынъ административлик япсарында янъыларда Кыргызстаннынъ бас каласы Бишкекте оьткен Савдуныялык коьшпели халклардынъ ойынларынынъ катнасувшыларын, сонынъ ез савгаларын казанган авдарыс спорт кеби бойынша Россиядынъ йыйылыс командасынынъ агзаларын, бизим яс ердеслеримизди шатлыклы эм оьктемли аьлде йолыктылар. Бизим ердеслеримиз – авдарыс спорт кеби бойынша патшалыгымыздынъ йыйылыс командасынынъ бас тренери Кемалуддин Нурлубаев, оны ман бирге Россиядынъ йыйылыс командасынынъ агзалары Альмир Апазов, Исмаил Амангельдиев эм Тангатар Курманакаев халклар ара ярысларда Россия элимиздинъ сыйын тийисли кепте яклаганлар. Авдарыс – ол бурынгы ногай миллет сынасувы, аьлиги заманда элимиздинъ аренасында энъ де яс спорт кеби. Авдарыс ойыны бойынша Россиядынъ йыйылыс командасы быйыл май айында Куьнбатар авылдынъ А.Э.Зекашев атындагы ипподромында 6 аьдемнен туьзилген. Сонынъ уьшеви – йогарыда белгиленген бизим яс ердеслеримиз, калган уьшеви – Татарстаннан. Кыргызстан элинде болып оьткен быйылгы ярысларда 120 эллерден 4 мынънан артык спортсменлер катнасканлар. Бу ойынлардынъ ашылувында Россия Президенти Владимир Путин де ортакшылык эткен. Ойынлардынъ сырагысында Россиядынъ йыйылыс командасынынъ агзалары, бизим ердеслеримиз Тангатар Курманакаев пен Исмаил Амангельдиев ез медальлерин казанганлар. Янъыларда Бишкектен кайткан яс ердеслеримизди Ногай районынынъ административлик япсарында, 30-дан артык автомашиналары байрам сырасына туьзилип, елпилдеген Россия, Дагестан эм ногай байраклары астында район орталыгы Терекли-Мектебке дейим алып келдилер. Авылга киретаган ерде спорстменлерди район ясуьйкенлери, яшавшылары эм миллет кийимлерин кийген атлылар аьдетли ногай шайы эм катламасы ман оьктемли эм кувнак аьлде йолыктылар. Районнынъ Халк яратувшылык уьйининъ янындагы ашык сахнада спортсменлер эм конаклар уьшин айырым концерт программасы коьрсетилди, уьш те йигитлеримизге коьп йылы кутлавлар айтылды, савгалар берилди. Шатлыклы шарада Ногай район администрациясынынъ аькимбасынынъ орынбасары Рашид Шангереев, район Депутатлар йыйынынынъ председатели Алибек Менласанов, Терекли-Мектеб авылдынъ аькимбасы Марат Кулунчаков, ДР Халк Йыйынына депутатка «Единая Россия» Савлайроссиялык политикалык партиясыннан кандидат Алибек Мурзаев, Ногай район Ямагат палатасынынъ председатели Эльмурза Саитов, «сельсовет Карасувский» СП МО аькимбасы Амирбек Арунов шыгып соьйлеп, Россиядынъ йыйылыс командасынынъ катнасувшыларына ийги йоравларын айтканлар. Йогары спорт етимислери уьшин спортсменлерге 250 мынъ маьнеттинъ акша сертификатлары, солай ок баалы савгалар берилгенлер. 

М-А.Ханов. 

Суьвретте: йолыгыс аьсеринде.