Янъыларда Дагестан Республикамыздынъ Сулак каньонынынъ Дубки авылында Х Халклар ара «Каньон – 26» деген октан 3D-атув бойынша базласувы йогары дережеде озды. Спорт шарада 250 спортсменлери белсенли ортакшыладылар. Дагестан Республикамызга туьрли ерлериннен, айтпага, Казахстан, Кыргызстан, Турция, Белоруссия, Узбекистан, Иран эм сондай баска коьплеген эллериннен спорттынъ ок атув кеби мен кызыксынган ваькиллери йыйылган эдилер. Ок атув бойынша базласувлардан баска болып, онынъ катнасувшыларына эм сыйлы конакларга аркан уьстинде усташа юруьвшилери, фольклор ис коллективлери оьз оьнерлерин коьрсеттилер, миллет спортынынъ ойынлары, мастер класслары, халк кол усталыкларынынъ выставкасы, пышак таслав, ат уьстинде ок атув, фехтование бойынша базласувлары да озгарылдылар. «Каньон – 26» деген октан 3D атув бойынша турнири спортты, аьдетлерди, маданиятты бирлестирип калмай, халклар ара дослыкты, тыпаклыкты беркитуьв коьпири де болды. Сол кызыклы спорт шарасында Ногай районынынъ Кумлы авылыннан Темиргали Танашев те ортакшылык этип, 30 секунда ишинде аьдетли октан атувда енъип, куьмис баргы иеси болды. Солай болып, Ставрополь крайындагы Нефтекум районынынъ Ыргаклы авылыннан да ногай ясымыз Ренад Байгишиев, сол шарада катнасып, октан 3D атув бойынша спорт кеби бойынша куьмис баргысына тийисли этилди. Темиргали Мурзагалиевич Танашев спорттынъ ок атув кеби мен коьптен кызыксынады. 2025-нши йылда ол оьткен октан 3D атув бойынша Россия ез баргысынынъ иеси, сол ок йылда Ставрополь крайында оьткен ок атув бойынша савлай ногайлар турниринде де катнасып, енъуьвши орынын бийлеген. Спортсмен ясларымызга келеекте де сол спорт кеби бойынша усталыкларын оьстирип, регионлар, савлайроссиялык, халклар ара базласувларында белсенли ортакшылык этип, енъуьвши орынларын бийлеп келгенлерин йораймыз.

 Г.Нурдинова. Суьвретте: енъуьвшилер сырасында Темиргали Танашев