Уьстимиздеги йыл Россия элинде Бирлик йылы деп Владимир Путин мен белгиленген. Бу йыл бизим коьпмиллетли республикамызда боьтен де уьйкен маьнели болады. Туьрли миллетлер бир ерди бийлеп, бир-бирисининъ аьдетлерин сыйлап, бир ерлерде аьел туьзип, яшав тыныш болмаса, бек кызыклы озгарадылар. Кайтип Россия Федерациясында, соьйтип, бизим коьпмиллетли регионымызда бу йыл бек кызыклы оьтеди: билимлендируьв тармагында район, республика бойынша шараларда балалар ортакшылык этип, савгалы орынларга тийисли боладылар… Тек янъыларда Ногай районымыздынъ ОртаТоьбе авыл мектебининъ окувшылары Аиша Сагиндикова ман Амалия Ярболдиева, «Халкларды бириктирген асабалык» деген республикалык форумда ортакшылык этип, оьзлери, йыл белгисине коьре аьзирлеген видеоролик бойынша биринши орынга тийисли болып кайттылар. Бу, Россия халкларынынъ Бирлик йылына багысланган шаралар ишинде, оьзгерисли деп айтпага да болады. Мунда савлай республикамыздынъ районларыннан окувшылар эм окытувшылар йыйылган эдилер, аьр кайсысы да оьзининъ янына якын номинация бойынша оьнерин сынап караган. Форумды болса, Дагестаннынъ Дин ислери эм миллет политикасы бойынша министерствосы Россия халкларынынъ Ассамблеясынынъ республикалык боьлигининъ колтыклавы ман уйгынлаган. Шарадынъ бас ниети: миллет тиллердинъ ярасыклыгын саклав эм коьрсетуьв, Дагестан халкларынынъ маданиятын эм аьдетлерин кенъ яйылдырув, ямагат арасында асабалык орынынынъ кепленуьвин коьрсетуьв. Бу форумда катнасув окувшыларга уьйкен сулып берди, Аиша Сагиндикова ман Амалия Ярболдиева Орта-Тоьбеде олар ман авылдас болып яшайтаган туьрли миллетли хатынлар ман хабарласув озгарып, ногай эр кисилер мен татым аьел курып яшав тыныш болмаса да, бек кызыклы экенин бир видеосюжет аркалы коьрсетип болдылар. Оьзек те, кызыклы болар, бир аьелде эки туьрли миллет аьдетлер сакланадылар, сол аьеллерде тувган аьвлетлер эки туьрли миллеттинъ маданиятын коьрип оьседилер. Сол тувыл ма асабалык эм байлык деген. Сондай шаралар оьсип келетаган яс несилдинъ яшавга карасын да туьрлендиреди. Олар бир республикада яшайтаган туьрли миллетлердинъ тар байланысын коьрсетедилер, тил байлыгымызды оьстиредилер, туьрли халклар ара макулласувды беркитедилер. Шара алдына салынган баьри мыратларды да толтырган окувшылар Аиша ман Амалия оьзлерининъ етекшиси Фатима Салим кызы Оразова ман бу куьнги каравшыларды сукландырып болдылар. Олар республикада биринши орынга тийисли болдылар. Яс корреспондент кызлар алдын да бир неше кере оьзлерининъ оьткир репортажлы материаллары ман коьплерди сукландырган эдилер, авыл мектебинде бир шара да олардынъ катнасувы болмай оьтпейди. Оьткир соьзли, тик караслы кызлар аркалы савлай районымыздынъ яшавшыларына (социаллык тармак пан пайдаланатаганларга) авыл мектебинде болатаган аьр кайсы шарадан да шебер тили мен тувра билдируьв этиледи. Кызларга алдыда тек уьстинликлер, окувда бийик белгилер! Г.Курганова. Суьвретте: савгалы орынга тийисли болган яс корреспондентлер сахнада.