Оьткен юмадынъ ишинде Ногай районымыздынъ Терекли-Мектеб авылынынъ Кадрия атындагы мектебинде Россия Язувшылар союзынынъ агзасы, шаир, Дагестан Республикасынынъ ат казанган маданият куллыкшысы, ДР Язувшылар союзынынъ ногай секциясынынъ етекшиси Гульфира Абдулаким кызы Бекмуратова ман кызыклы яратувшылык йолыгыс озды. Бу шара мектеб китапханасынынъ етекшиси Марина Арслан кызы Межитова эм ногай тил сабагы бойынша окытувшысы Кайтархан Кокшеева ман уйгынланды. Шарага туьрли класслардынъ окувшылары келдилер, аьр бир конак болган киси автордынъ ятлавларын окыды, оьзлерининъ терен сезимлерин ятлав аркалы коьрсеттилер. Йолыгысты уйгынлавшылардынъ куьш салувы ман буьгуьн конак болып келген шаир Гульфира Бекмуратовадынъ суьвретлериннен видеослайдлар коьрсетилдилер, окувшыларды автордынъ китаплери мен таныстырдылар. Кайтархан Кокшеева балаларга Гульфира Абдулаким кызынынъ яратувшылык йолы акында кызыклы хабарлады эм автордынъ янъыларда баспадан шыккан «Мен сени куьтемен, белгисиз аьскерши» китабининъ иштелиги акында Марина Арслановна Межитова айтып оьтти. Соьз Гульфира Бекмуратовага да берилди. Ол оьзининъ балалыгы, шаирлик йолы, язган асарлары, сол биз йогарыда белгилеген китабининъ болувы акында терен ойлы сезимлери мен боьлисти. Оьзек те, шаир оьзининъ ятлавларын да окыды. Автор оьз асарларын окыгандай этип, бир окувшы да тынълавшыга онынъ сезимлерин еткерип болмайды (йок, мен ятлав окыйтаган аьдемлерге тоьреши тувыл), тек автор ятлав язган шагындагы коьнъилин оьзи окыганда коьрсетип болатаганы акында ойымды айтаман. Шаир. Ол ким дейтаган болсанъыз, меним ойыма коьре, яшав йолын бир-эки абытка алдын яшайтаган инсан деп айтар эдим… Бу куьн шаир окувшыларга оьз халкын суьймеге, тарихти, тувган тилди сыйламага шакырув этти. Окувшылардынъ берген соравларына яваплар да берди. Бу куьнги йолыгыста окувшылардан баска болып, мектеб етекшисининъ окув тербиялав бойынша орынбасары З.Оракова ортакшылык этти, ол да Гульфира Бекмуратовадынъ яратувшылыгы акында оьз ойы ман боьлисти эм мундай шаралардынъ уьйкен тербиялав маьнеси бары акында айттып кетти – адабиятка суьйимди кеплейди, тилди байытады. Бу йолыгыс коьплеген окувшылардынъ эслеринде калаягына шек йок.

 Г.Курганова. Суьвретте: шаир мен йолыгыс.