Янъыларда Кизляр, Южно-Сухокумск калалары эм Кизляр районы бойынша военный комиссары Рамазан Курамагомедов оьз ис йорыгы ман келуьвинде Кизляр районынынъ аькимбасы Аким Микировка Суворов эм Александр Невский гвардиялык орденли 291-нши мотострелковый полкынынъ командири гвардия подполковниги Р.Тохтахунов атыннан Разылык хатын тапшырды. «291-нши гвардиялык мотострелковый полкынынъ етекшилеви эм онынъ савлай тизими согыс спецоперациясы юрген ерде оьз аьскершилик борышын тийисли эм йигитлерше толтыратаган, Россия Федерациясынынъ Савытлы Куьшлерининъ аьскершилерине эм офицерлерине гуманитарлык югин йибергени уьшин оьз разылыгын билдиреди. Сизинъ ян-коьнъил яктан демевлигинъиз эм гуманитарлык ярдамынъыз – Енъуьвди ювыклатув эм ортак исимиз уьшин бек уьйкен маьнели», – деп айтылады йиберилген Разылык хатында. Белгилеп озайык, согыс спецоперациядынъ басыннан алып муниципалитеттинъ яны авырыган яшавшылары, меценатлар, предпринимательлер эм онынъ етекшилеви Кизляр районы гуманитарлык югин йыювда эм йиберуьвде белсенли аьрекетлеп келеди. Савга тапшырылганнан сонъ, оьз соьзинде Аким Микиров район аьскершилерге келеекте де баьри яклы коьтергишлевин этип келееклерин белгиледи. Баска болып, сол гуманитарлык ярдамын йыювда эм йиберуьвде ортакшылык этуьв – ол тек борыш болып калмай, аьр бир яшавшыдынъ ортак исине шынты юреги мен оьз уьлисин косувы да болатагыны акында билдирди. 

Суьвретте: савга тапшырув мезгили.