Аьр бир аьдемнинъ оьз йолы бар. Сол йолды кайтип оьтеегин инсан оьзи сайлайды. Бир-бир заманда аьдем, онынъ тек яшавын тувыл, ойларын туьрлендиретаган карар алады. Бизим йоллар туьрли. Сол йолларда бизди кайдай кыйынлыклар карап турганын тек Кудай биледи. СВО еринде Аталыгымызды коршалап турган йигитлеримиз оьзлери алганлар тийисли карарды, оьзлери сайлаганлар, кайда олар болмага керегин. Олар буьгуьн оьз элин коршалавда, неге десе заман соны талаплайды. Дагестан Республикасынынъ Ногай районынынъ Бораншы авылында тувыпоьскен Динислам Акмурзаев Мавлидин Зияв увылы эм Сакинат Оразбай кызынынъ аьелинде оьскен. Атасы тувган авылында электрик болып, анасы – баслапкы классларынынъ окытувшысы болып ислейдилер. Динисламнынъ аьптеси Маржан эм агасы Нурсаид бар. Балалар Акмурзаевлердинъ аьелинде куллыксуьер, намыслы болып оьстилер, баьриси де окыдылар, аьли кесписи бойынша куллык этедилер. Динислам мектебте оьзин ийги яктан коьрсеткен, тенълери мен катнасувлары аьруьв эди. Окытувшылар оны тербиялы, билимли окувшы деп эсине аладылар. Динисламнынъ бир ийги касиети бар – ол алдына мырат салады эм ога етиспеге шалысады. Ерли мектебте 9-ншы классты кутарып, ол Астрахань каласына лицейге туьседи эм «автомеханик» кесписин байырлайды. Эр борышын Динислам Акмурзаев Каспий флотилиясында толтырган. Мунда СВО еринде куллык этуьвге контрактка кол баскан. 2023-нши йылдынъ шилле айында Динислам согыс спецоперация ерине кеткен. Запорожская областининъ Работино авылынынъ касында яраланып, Симферополь каласында эмленген. Реабилитация оьткен сонъ, Каспий флотилиясынынъ аьскерлер боьлигине йибериледи, сонда аьскерши аьлиги заманга дейим ислейди. Динислам Акмурзаев – согыс аьрекетининъ ветераны. Бизим йигерли ердесимиз согыс патшалык баргысына коьрсетилген. Динислам эм Аида Акмурзаевлер эки увылларын тербиялайдылар – Адамды эм Абдуллахты. Балалар атасы ман оьктемсийдилер, ол – йигитликтинъ эм Аталыкка алал куллык этуьвдинъ коьрими. Шоьлимиздинъ баьтири мен биз де оьктем. Тез кайтып келсин сав-саламат болып, уьйге аьскершилеримиз. Енъуьв мен.

Г.Бекмуратова. 

Суьвретте: Д.Акмурзаев аьели мен.