2022-нши йылдынъ увыт айынынъ 24-нши куьнинде Россия Федерациясынынъ Президенти Владимир Путин Украина еринде согыс спецоперациясы басланды деп билдирди. Оькиметтинъ айтувы ман, киев режими куьнбатар эллердинъ коьтергишлевине таянып, Россиядынъ бойсынмаслыгына кавыфлык тувдырады. Сондай туьзилип турган аьллерде Россия согыс спецоперациясын оьткеруьвден
баска йоллар коьрмейди, онынъ бас борышы – националист
туьзилислерден коршаланув.
Кайзаманда да Россия аьскершилери Аталыкты саклавда баьтирлик эм коркынышсызлык коьрсеткенлер – бурынгы заманда, Уллы Аталык согысында, буьгуьнги урысларда. Аьлиги аьскершилер тек бизи мен тар байланыс туткан Донбассты коршаламайдылар, олар оьз куьшин, яшавын Элимизди саклав уьшин, тынышлык уьшин бередилер. Оькинишке, буьгуьнлерде сонынъ баасы айлак уьйкен. Биз баьримиз де оьз баьтирлеримизди эсимизде саклап, оларга
сый этпеге керекпиз.
Эльдар Ирмагомет увылы Саитов Шешен Республикасында тувган. Ястынъ балалыгы эм яслыгы Дагестан Республикасынынъ Ногай районынынъ Кумлы авылында нагаш юртында оьтти. СВО ерине кеткенше Эльдар аьлейи Гульбария, аьвлетлери Насипли, Алихан, Мухаммад-Али эм Хадиджа ман Главсулак поселогында яшайтаган эди, аьлиги заманда аьели оны сол ерде куьтип турады.
Эльдар Саитов «Ахмат-спецназ» подразделениесинде куллык этеди. Баьтирлерше эм яваплылык пан оьз борышын толтырганы, нызамлыгы, СВО еринде коьрсеткен йигитлиги уьшин Эльдар Саитов куллык этетаган боьлигининъ етекшилеви атыннан Сый грамота алган, солай ок ога Уллы
Аталык согысында Енъуьвдинъ 80 йыллыгы ман байланыста омырав белгисин тапшырганлар.
Биз ердесимизге эм оны ман бирге баьри коршалавшыларымызга уьйге енъуьв мен кайтып келгенин йораймыз. Эльдардынъ айтувы ман, олардынъ коркпага бир ыхтыярлары да йок, неге десе аьскершилеримиз артында – Уллы
Россия. Кайбириси де тувганларын кушагына алсынлар эм тынышлы дуныяда яшасынлар!
Г.Бекмуратова.
Суьвретте: Э.Саитов СВО еринде.