Янъыларда Москва каласында литераторлардынъ Орта Уьйининъ уьйкен залында А.Чаковский атындагы «Гипертекст» сын савгалав церемониясы оьтти.
Уьш номинация бойынша енъуьвшилер белгиленди.
Биз суьйиниш пен «Орысша коьшируьв» номинациясы бойынша энъ де ийги деп Дагестан Республикасынынъ Халк язувшысы Бийке Кулунчакова «Россия –
меним бактым» деген поэмасы ман эм ногайшадан коьшируьвши, ДР Халк шаири, Дагестан Республикасынынъ Язувшылар союзынынъ председатели Марина Ахмедова-Колюбакина белгиленгенин айтамыз. «Литературная газетадынъ» бас редакторы эм жюри председатели Максим Замшев конкурстынъ
акында оьз ойын айтты.
– Бу конкурста коьрсетилген шыгармалар баьри жанрларда аьлиги заманнынъ орыс адабиатынынъ аьлин белгилейди. Ол Аталыкка суьйимнинъ, орыс соьздинъ
негизинде, дайымлык баалыклардынъ беркитуьвине эм маьнесин излевге каратылган, – деди ол.
Талаплы ногай язувшысы Бийке Кулунчаковадынъ «Россия – меним бактым» поэмасы «Литературная газетадынъ» бетлеринде баспаланган.
«Шоьл тавысы» республикалык газетасынынъ коллективи эм Дагестан Республикасынынъ Язувшылар союзынынъ ногай секциясынынъ язувшылары енъуьвшилерди кутлайдылар эм оларга аьлиде коьп бийикликлер йорайдылар.
Г.Бекмурат ова,
Россия Язувшылар союзынынъ агзасы.
Суьвретте: Б.Кулунчакова эм
М.Ахмедова савгалав шарасында.