Республикамыздынъ бас каласы Махачкалада «Россия – меним тарихим» деген тарих паркында 31-нши май куьнинде «Меним Дагестаным. Мен яшайтаган ер» проекти ишинде «Дагестаннынъ аьдет-йорыклары» аьел фестивали болып озды.
Фестиваль барысында республикадынъ тарихи, маданияты эм табият ярасыклыгына багысланган – «Бизим карагуслы Дагестан», Уллы Енъуьвдинъ 80 йыллыгынынъ эм Аталык Коршалавшы йылынынъ сыйына «Енъуьв Байрагы» конкурслары озгарылды. Онда оьткен йылдынъ декабрь айыннан алып 2025-нши йылдынъ апрель айына дейим Дагестан, Ямал, Югра эм Москвадан оьз ислери мен 7 ястан 12 ясларына дейимги 5 мынънан артык балалар ортакшылык эттилер.
Ол – уьйкен конкурстынъ финал болжалы: баслап экспертлер проектлерге дистанционлык йорыгы ман баабердилер эм ийгилерин айырдылар.
Биринши болжалда туьрли районлардан енъуьвши балаларды тек авгалап калмай, айырым биревлерди Москвага выставкага шакыраягын билдирдилер. Онда олар оьз проектлери акында хабарламага эм ойлары ман боьлиспеге болаяклар. Жюри агзалары сырасына тоьмендегилер кирдилер: ДР билимленди-
руьв министри Яхья Бучаев, тил политикасы бойынша РФ Президентиндеги Советининъ председателининъ орынбасары Константин Деревянко, «Дагестанская правда» газетасынынъ бас редакторы Бурлият Токболатова, «Дагестан» ГТРК етекшиси Луиза Алиханова, ДР бойынша Регионлар ман басшылав орталыгынынъ етекшиси Исрафил Исрафилов, ямагат аьрекетшиси Алибег Сираждинов. Куллыкларга баа беруьвде РФ ФС Государстволык Думасы-
нынъ депутаты Султан Хамзаев те ортакшылык этти. Аьр номинацияда жюри экисер енъуьвшилерди белгиледи. Айырым эс каратылды «Ногай шоьли, шет-кырыйсыз шоьли» номинацияга. Онда енъуьвши болган Залина Кульчиева диплом ман эм Енъуьвшидинъ кубогы, солай эстеликли баргылар ман савгаланды. Енъуьвши орынды бийледи солай ок Нариман авыл балалар
бавынынъ тербияланувшысы Нурлан Асанов.
Конкурс, «Меним Дагестаным. Мен яшайтаган ер» проекти бойынша оьтип, балалардынъ актарув ислери эм яратувшылыгы аркасы ман республикамыздынъ бай тарихи эм маданияты ман танысувга каратылган. Проект етекшиси эм насихатшысы – Терекли-Мектеб авылынынъ Джанибеков атындагы мектебининъ баслангыш классларынынъ окытувшысы Гульнара
Солтанхановна Хозбулатова.
