Оьткен юма озган Халк Депутатлар Йыйынынынъ экинши сессиясында официаллык аьлде Дагестан Республикасынынъ Аькимбасы сайланды. Республикамыз уьшин бу бек маьнели оьзгерис. Россия Президенти Владимир Путин маслагатлаган уьш кандидат ишинде, депутатлардынъ коьбиси курал айыннан алып республикамыздынъ Аькимбасынынъ куллыгын кесек заманга юриткен Федор Щукинге тавысларын бердилер. Бес ай узагына Дагестан Аькимбасынынъ куллыгын кесек заманга юритуьвши болып аьрекетлеви Федор Щукиннинъ яваплылы каравын коьрсетти. Ол элимиздинъ етекшиси Владимир Путиннинъ сенимин аклав эм Дагестаннынъ социаллык-экономикалык оьрленуьвине янъы куьш беруьв деген мырат пан келген. Оьзининъ сайлавлар алдындагы соьзинде Федор Щукин булай белгиледи: «Дагестан – мынъйыллык тарихи болган ер, энъ де коьп миллетли республика, мунда аьдемлер ислеп, енъип боладылар, эм олар онъайлы аьллерде яшамага тийислилер. Ама бизим алдымызда коьп туьрли маьселелер турадылар, соны биз, бос антлар бермей, шешпеге керекпиз». Онынъ согыс спецоперация катнасувшыларынынъ эм олардынъ аьеллерин коьтергишлевге эс этуьвин де белгилемеге суьемиз. Биз уьшин ол – приоритетли сорав. Федор Щукиннинъ бу иске келуьвин бизим аьскершилерди коьтергишлев тагы да йогары дережеге етер деген сенимлер мен байланыстырамыз. Сессияда шыгып соьйлеятып, Федор Щукин бу – согыс спецоперация оьтеяткан эм элимизге санкциялар токтавсыз салынатаган тыныш болмаган заманларда аьр биревден яваплылык, биргелесуьв эм баьри куьшлерди салып куллык этуьв керегин белгиледи. Ол республика маьселелерди шешип болаягына шекленмейтаганын билдирди. Сол зат республика Аькимбасы, биз биргелесип кыйынлыклардан оьтип, регионнынъ оьрленуьвин канагатлар уьшин, ямагат пан тар байланыста ислемеге аьзир экенин шайытлайды. 

Нурият Кожаева.