Дагестан Аькимбасынынъ куллыгын кесек заманга юритуьвши Федор Щукин РФ Президентининъ Администрациясынынъ етекшисининъ биринши орынбасары Сергей Кириенко ман Дагестаннынъ оьрленуьв йолын ойласты. Федор Щукин регионда уьйкен инфраструктура проектлерин яшавга шыгарув эм дагестанлыларды айлак та навасызландыратаган соравларды шешуьв ислери бардырылатаганын айтып белгилеген. Кириенко табиат баьле-казасыннан сонъ республикадынъ янъыдан ярастырылувына, олай дегени, регионда явыншашынлардан бузылган социаллык объектлерди эм турак уьйлерди курув ислери тамамланып барувына йогары белгисин берген. Онынъ сондай белгиси уьшин республика басшысы оьз разылыгын билдирген. Регион етекшиси Кириенкога «Дагестан командасы» деп аталган кадрлар программасы акында хабарлаган. «Конкурс аркасы ман бизим республикадынъ оьрленуьви уьшин оьз билимлерин эм ис сулыпларын кулланмага аьзир болганларды айырамыз. Солардынъ катнасувшылары ман соьйлесуьвлерди оьзим юритемен», – деген ол. Ф.Щукин мен С.Кириенко федераллык орталыгы оьз ягыннан республикадынъ баславларын колтыкламага аьзир экенин белгилегенлер. Ортак ниет – гражданлардынъ яшав сапатын ийгилендируьвге онъайлы шартлар туьзуьв, инвестицияларды келтируьв эм Дагестанда туризм тармагын армаган арттырув.