Уллы Енъуьв куьни тек элимиздинъ калаларында эм авылларында, баска эллерде белгиленип калмады, согыс спецоперациясы озган ерде де белгиленди. Йигитлик эм эрклик коьрсеткен россия аьскершилери 9-ншы Майда орденлер эм медальлер мен савгаланадылар.
Бу йыл байрам куьн бизим ердесимиз, согыс спецоперация катнасувшысы Маирбек Эдильбаевич Саламатовка «СВО катнасувшысына» деген медаль тапшырылды.
Маирбек Саламатов оьзининъ нагашатайы Уллы Аталык согысынынъ катнасувшысы Курман-Али Компаевтинъ акында эсти саклайды. Атайы ога коьрим, эркликтинъ эм Элине
алаллыгынынъ белгиси болган. Курман-Али Компаев Караногай районынынъ Сылув-Тоьбе авылында тувган. Согыс басланганда, Кизляр военкоматы ман шакыртылган. Бу куьн онынъ уныгы СВО катнасувшысы, данъклы аьдетлерди бардырып, Эли алдында оьз борышын намыслы толтырады. Атайынынъ эм уныгынынъ данъклы аьскер йолы тек аьел тарихи болып калмайды, ол – бизим ортак тарихимиздинъ кезеги. Озган оьмирдинъ 40-ншы йылларында эм бу куьнлерде нацизм мен куьрескенлердинъ бирлиги элимиздинъ оьктемлиги болады.
Маирбек Эдильбаевич Саламатов конъысы Шешен Республикасынынъ Шелков районынынъ Сары-Сув авылында тувган. Онынъ балалыгы баска тенълериндикиннен баскаланмай озды. Йигиттинъ эл алдында эр борышын толтырмага заманы еткенде, оны бактысы узак Хабаровск крайынынъ Комсомольск-на-Амуре каласына аькетти. Ногай ясларга тийисли кепте кызмет кылувын оьтип, Маирбек Кизляр каласында ОМВД боьлигинде оьзин яваплылы куллыкшы этип коьрсетти. Сонъ Норильск каласында шахтада да иследи.
Яшав оьз йорыгы ман барады, элимиздинъ аьдемлери ислейдилер, оьз алдына ниетлер саладылар. Тек алыс болмаган Украинада кардаш Донбасс халкына эзиет этиледи. Оларды эм оьз япсарларын коршалав уьшин Россия согыс спецоперациясын басламага амалсыз болады. Соьйтип бизим ногай яс 2023-нши йылда Норильск каласыннан, Россия Федерациясынынъ Коршалав министерствосы ман контракт беркитип, СВО озып турган ерге йолланады. Мине уьш йылдан бери «Бек» деген шакырувы болган йигерли ердесимиз аьскер борышларын толтырады. Дав майданда коьрсеткен эрклиги уьшин ол «За отвагу» медали мен савгаланган, аьскер исине аьзирленуьвде йогары коьрсетимлер уьшин ога Сый грамота тапшырылган.
«Шоьл тавысы» республикалык газетасынынъ куллыкшылары аьр дайым да СВО катнасувшылары ман бетке-бет коьриспеге, аьллеспеге, олардынъ авызыннан болган ислер
акында эситпеге, баьтирлер айтпаганды мунълы коьзлерине карап билмеге амаллы болмайдылар. Коьп бетинде йигитлер акында олардынъ кардашларыннан сорап, аз-маз хабар эситедилер. Солай болды мени мен де Маирбек Саламатов акында язганда, ама оннан оьзгелей колыма онынъ акында аьскер йолдаслары ога багыслап язган йыр туьсти. Кайдай йыр, кайдай сыдыралар багысланган ногай яска. Сондай соьзлер тек куьш-куватлы, йигерли, аслан юрекли, яв алдында бир де шоькпеек йигитке багысламага болаяк. Сол йырды тынълаган 2-3 такыйка ишинде мен Маирбекти таныгандай, ол алдышылыкта явды каты, коркынышлы сокканын коьргендей болдым. Йырда аьскер йолдаслары Маирбек Эдильбаевичтей командир карсы келгенине бек разы болувын, олар ога энъ де аявлы яшавын сенетаганларын эм онынъ уьшин яшавларын да аямаякларын
билдиредилер. Командир баьри затты ойлап, шегип, йогары дережеде аьскер борышларды толтырады эм душпан кери кайтады. Аьскершилер де намыслы кепте борышларды толтырып, командирлерининъ сенимин акламага шалысадылар.
Тезден Маирбек Эдильбаевич кыска болжаллы тийисли тыншаювга кайтпага керек, сол заманда оны ман коьрисип, Аталык коршалавшыларымыз уьшин оьктемситкен хабарлар
эситермиз деп сенемиз.
Маирбек Саламатовка эм онынъ аьскер йолдасларына шыдамлык эм эрклик йораймыз. Сондай йигитлеримиз бизим Элимиздинъ нацизмнинъ алдында аьли де бир Уллы Енъуьвин ювыклатадылар.
Нурият Кожаева.
Суьвретте: М.Саламатов.