Согыс спецоперациясынынъ 5-нши йылы юритилип турады. Бу йылды элимиздинъ Президенти Владимир Путин Россия халкларынынъ бирлик йылы деп белгилеген. Соны ман байланыста, оьз ногай йигитлеримизден баска болып, Ногай районымыздынъ Шумлелик авылында яшайтаган кардаш даргин миллетли ваькиллерининъ акында да арада язаман.
Бизим «Шоьл тавысы» республикалык газетамыздынъ редакциясында ай сайын оьткерилетаган СВО катнасувшылары ман йолыгысларда кеделер СВО ортакшылары баьри де бирбирине тенъ, эш ким де биревди де миллети бойынша айырмайды, аьскершилер тувган агалар эм инилер кимик бир-бириси мен татым дейдилер. Тап сол кепте Уллы Аталык согысы йылларында да болган, мунда да орыс аьскершидинъ каны дав майданында татардыкы, умдурттыкы, ногайдыкы, кабартыдыкы, якуттыкы эм баскалардыкы ман катыскан. Ол кайсы заманда да солай болган эм болаяк, неге десе баьрисининъ де артында бир ортак Элимиз – Россия.
СВО басланган заманнан алып Шумлелик авылыннан эки агалыинилидинъ балалары: Али Магомедович пен Али Багомаевич Хаттаевлер де сонынъ белсен катнасувшылары боладылар. Эки кардашлар да мунда тувып оьскенлер.
Али Магомедович, ол 1981-нши йыл тувган, буьгуьнлерде штурм ротасынынъ командири эсабында Херсон областинде согысады.
Белгилеп озув керегеди, ол кадр офицери тувыл, ама оьзининъ йигерлиги эм эрлиги мен аьскер боьликтинъ командованиесининъ сондай йогары сенимин казанган.
Дав борышларын толтырып турган заманында данъклык коьрсеткени уьшин «Эрлик» ордени мен савгаланган. Онынъ иниси Али Багомаевич, ол 1987-нши йыл тувган, «Ахмат»
деген оьз эркли аьскер куьбининъ агзасы, Донецк Халк Республикасын укронацистлерден босатув ниет пен юритилген согыс операцияларында ортакшылык эткен.
Аьлиги заманда ол яраланган (онынъ шаркы 60 процентке куьйген) эм Донецк каладагы госпитальде эмленеди. Былтыр оны «Дагестан Республикасы алдында етимислери уьшин» деген орден мен савгаладылар. Али Багомаевичке бу йогары савгады ол замандагы Дагестан Аькимбасы Сергей Меликов оьзининъ ис кабинетинде тапшырган. Шумлелик орта мектебининъ директоры Омаргаджи Шахбановтынъ айтувы ман, сол ок куьн оны ман бирге «Эрлик» орденин (уьшинши кере) генерал-майор, Россия Баьтири,
«Ахмат» оьз эркли аьскер куьбининъ командири Апти Алаудинов те алган. Омаргаджи Шахбанов солай ок эки агалы-инили Хаттаевлер онынъ ювыклары боладылар деп билдиреди. Олар экеви де мектебте оьзлерине тапшырылган борышлар уьшин яваплы, спортты бек суьйгенлер эм соны ман белсен каьр шеккенлер, оьз халкынынъ, республикадынъ эм Тувган Элининъ уьйкен патриотлары болганлар. Сол себептен биревге де тамаша тувыл олар экеви де буьгуьнлерде Аталыгымыздынъ бактысы шешилип турган дав майданында согысып турганына.
М-А.Ханов.
Суьвретте: А.Хаттаев.
