Россия тарихинде патшалык байрагы бир неше кере туьрленген. 1705-нши йылда патша Биринши Петр «баьри савда кемелеринде де» ак-коьк-кызыл туьсли байракты беркитпек деп Указ шыгарган. Сонынъ астында халклар ара ислери де юритилген, россия патшалыгынынъ белгиси кара-алтын-ак туьсли байрак болып калган. Сондай эки яклык тек Биринши дуныя согысы заманында тайдырылган эм сол йылларда Россия байрагы оьзининъ аьлиги кебине келтирилген. Оннан сонъ 1924- нши йылда Совет власти ак-коьк-кызыл туьсли байракты аклардынъ байрагы деп санап, сонынъ орынына муьйисинде юлдыз бан орак эм шоькиш ясалган кызыл байракты патшалык белгиси этип беркиткен. Сол байрак Уллы Аталык согысын оьтип, 1945-нши йылда Берлинде рейхстаг уьстине салынган эм соннан бери халкымыздынъ Енъуьв байрагы деп саналады. Алдынгы ак-коьк-кызыл туьсли триколор 1991-нши йылдынъ 22-нши август куьнинде Москвадагы РСФСР Оьр Советининъ ак меканы уьстинде елпилдеп, онъайсыз басланган путчтынъ кутылувын билдирген. Россиядынъ алдынгы тарих байрагы кайтадан яшавга келуьви мен байланыста 1994-нши йылда Россия Президенти Борис Ельцин 22-нши август куьнин патшалык байрагынынъ байрамы деп токтастырган. «Патшалык байрагы бизим аьдетли байлыкларымызга алаллыгымызды билдиреди эм солардан – акыйкатлыктан эм дурыслыктан, бир ниетликтен эм саваплыктан, коьп оьмирли кутылмас Россия тарихине, бизге Тувган Элимизди сакламага эм коршаламага оьсиет эткен ата-бабаларымыздынъ уьстинликлерине эм енъуьвлерине сый этуьвимиздинъ белгиси болады.