Буьгуьн 12-нши июньде савлай элимиз энъ маьнели патшалык байрамы – Россия куьнин белгилейди.
Сол куьн бизим уьйкен коьпмиллетли элимиздинъ яшавшыларынынъ юреклерин оьзлерининъ уллы Тувган Эли уьшин айырым оьктемлик бийлейди. «Патриотизм, Аталыгымыздынъ бактысы уьшин яваплыкты бизге уллы ис эм согыс енъуьвлерине етискен ата-бабаларымыз оьсиет этип кеткенлер. Аьлиги заманда биз олардынъ етимислери, дайымлык тыпаклыгы, тувган еримизди коршалавга коьте-
рилуьвге уьйкен ымтылысы, ортак бир эмишлик эм Аталыктынъ оьрленуьви уьшин куллык этпеге
суьйимлиги не зат экенин айлак та оьткир кепте анълаймыз», – деген Россия Федерациясынынъ Прези-
денти Владимир Путин. Байрамнынъ ниети – Россия Федерациясынынъ ортакмиллет бузылмаслыгын белгилев, баьри несиллерде де патриотизм сезимин тербиялав.
Заман оьткен сайын бу байрам- нынъ баска бир ягы алдыга шыгады – ол янъы заман кесегининъ
басланувы, янъы патшалыктынъ тувувы эм Россия элимиз буьгуьнлерде келеекке уьйкен сенимлик пен карайды. Мине сол зат бу байрамнынъ бас маьнелиги: Россия куьни янъы элимиздинъ тувган куьни
эм сонынъ бирлик куьни болады. Аьлиги заманларда, Украинада согыс спецоперациясы юритилуьви мен байланыста тыс политикалык аьллери кайнавлы болган шакта, Россия куьни янъы маьнеди – кыйынлыклар алдында халкымыздынъ бирлесуьвин, соларды енъмеге аьзирлигин, оьз патшалыгымыз, сонынъ куьши эм суверенитети уьшин оьктемли болувды анълатады.
Россия куьни – ол бизим бирлигимиз эм патриотизмимиз акында эсимизге салады, Тувган Элимиздинъ хайыры уьшин белсенли аьрекет этпеге бизди коьнъиллендиредиэм элимиз, онынъ маданияты эм туьрлилиги уьшин оьктемситеди.