Россия Федерациясынынъ Президенти Владимир Путиннинъ указы ман – 2026-ншы йыл Элимиз бойынша Бирлик йылы деп белгиленген. Соны ман байланыслы болып, кайтип эл бойынша, соьйтип, республикамызда да салынган планларга коьре, шаралар оьтедилер эм алдыда, йылдынъ экинши ярым йылында да озгарылаяк шаралар бар. Соьйтип, Дагестан Республикасында йылдынъ белгисине коьре оьтпеге керек шаралар планы бойынша беркитилген. Алынган карарлар бу куьнлерде бир иркилуьвсиз яшавга шыгарыладылар. Оьзек те, солардынъ болувына куьш салатаганлар, тийисли йорыкларга коьре ис бардыратаган яваплы аьдемлер де бар. 2026-ншы йылда, Бирлик йылына багысланып, 80-нен артык шаралар болмага керек эди, аьли уьшин солардынъ яртысыннан артыгы уьстинликли оьткерилген. Уьстимиздеги йылдынъ экинши ярым йылында оьтееклер саны да аз тувыл. Алдыда шет эллерде яшайтаган ердеслеримиз уьшин Халклар ара фестивали, Савлайроссиялык «Голос Евразии» деп аталган миллет фестивали бизди куьтедилер. Оннан сонъ кырк кийик айынынъ ишинде, Россия халкларынынъ тиллер куьнине эм Дагестаннынъ халкларынынъ бирлик куьнине рас барып, «Ак турналар куьни» деген 40-ншы Халклар ара адабият Гамзатов фестивалин, «Халклардынъ бирлиги – Россия куваты» деген регионлар ара миллет политикасы бойынша тармактынъ етекшилерининъ конференциясын, «Россиядынъ куьши – халклардынъ бирлигинде» деген форум, «Меним аьелим – Россия» Россия халкларынынъ ямагат яратувшылыгынынъ форум-фестивалин, «ТаркиТау» китап фестивалин СыртКавказ бойынша, «Аьдетлерди саклав» халклар ара фестивальди, халклар ара дин фестивалин, «Несиллер акылы Россиядынъ бирлигинде» деген Кубыла Россия ясуьйкенлери уьшин форумды эм сондай баска шараларды оьткеруьв планда бар. Йыл узагында аьли де Россияда бирлик йылын белгилев мен байланыслы шаралар озгарылувы бардырылады эм солардынъ баьриси де элди оьрлендируьвге эм тынышлыкты саклавга каратыладылар.