Ногай районында «Дагестан» Этномедиахолдингтинъ «Шоьл тавысы» республикалык газетасынынъ коллективи сайлавларда белсен катнасты, редакция куллыкшылары уьш куьннинъ ишинде болып турган оьзгерислери акында тек язып калмай, элимиздинъ эм республикамыздынъ келеектегиси уьшин тавысларын бердилер. «Шоьл тавысы» республикалык газетасынынъ бас редакторы Эльмира Кожаева яшавшылардынъ сайлавларга келуьви Ногай районында йогары экенин белгиледи. – Муниципалитетте аьдем калмагандыр сайлавларга келмеген. Аьдетинше, бизим район сайлавларда катнасувда уьйкен процент беретаган. Аьдемлер аьеллери мен келедилер, ярасык болып кийинип, сол зат мага совет йыллардагы сайлавларды эсиме салды, – деп айтты ол. Дагестан Республикасынынъ Язувшылар союзынынъ ногай секциясынынъ етекшиси, «Шоьл тавысы» республикалык газетасынынъ корреспонденти Гульфира Бекмуратова оьзининъ киши Аталыгы – Дагестаннынъ энъ де сырт авылы Уйсалганда тавысын берди. Онынъ айтувы ман Орта-Тоьбе эм Уйсалган авылларында сайлавларга яшавшылар токтамай келип турадылар. – Оьзлерининъ уьйшиликтеги ислерин калдырып, сайлавшылар тавысларын бермеге алгасайдылар. Олар элимиздинъ, оьз аьвлетлерининъ келеектегисин сайлайдылар. Бизим ортак уьйимиз – уллы Россия, – деди Гульфира Бекмуратова.

 Ббизим хабаршы.