Тувган еримиздинъ увыллары,
Россиядынъ тиреви болынъыз
Сиз элимиздинъ ярык сеними
Акыллы эм танъ куьши
Элимизге кыйынлы заманларда, коркынышты билмеген увыллары явды каты сокканлар.
Кан тоьгисли урысларда олардынъ биреви де савгалар акында ойламаганлар. Аьр кайсысы
да тувган ерди явдан босатпага, оьз халкын, элин, аьелин коршаламага эм аман-эсен уьйине кайтпага суьйген. Аьли де – элимизге кыйын заманда, СВО катнасувшылары оьз Аталыгы уьшин эрлик, шыдамлык эм кардашлык коьрсетип, савгалар эм медальлер уьшин куьреспейдилер. Олардынъ энъ де
куьшли оттынъ ишинде куьйгенлери согысларда энъ де уьйкен савга деп – аман-эсен уьйге кайтувды, кан тоьгисли урыслардан сонъ тагы да куьннинъ коьзин эм кардаш-тувганларын коьруьвди санайдылар. Бизим ердесимиз Сталинбек Янгишиев те оьзин аямай, савгалар уьшин явды сокпаган.
Сталинбек Янгишиев Терекли-Мектеб авылында тувган. А-Х.Джанибеков атындагы мектебининъ Уьйкен аьриптен окытувшылары келеектегиде Аталыкты коршалавшыды элин суьйип, намыслы эм танъ юрекли этип тербиялаганлар.
Яс «Сатувлар бойынша менеджер» кесписин Черкесск каласындагы Сырт-Кавказ патшалык Кызмет кылувын бизим ердесимиз Алтай крайында ракета аьскерлеринде оьткен. Ол 2009-ншы йыл Россия Коршалав министерствосы ман контракт туьзген эм Шешен Республикасында службасын бардырган. Согыс спецоперациясы озып турган ерге Сталинбек Янгишиев 2022-нши йылдынъ июнь айында кеткен. Ол урыслар, согыстагы авыр куьнлер, СВО озып турган ерде такыйка сайын олардынъ артыннан
юрген кавыфлык, оьз йигитликлери акында айтпага суьймейди. Бу куьнлерде тийисли тыншаювдагы ердесимиз уьйкен сый ман оьзининъ командири акында айтады.
– Дав майданда Яратувшыдан сонъ командирге сенесинъ.
Бизге болса, бек ийги, сулыплы, аьдил эм танъ командир туьсти. Командир болув – ол уьйкен яваплылык. Аьскершилер сага оьз яшавларын сенедилер, сонынъ уьшин олар аман калсын деп баьри затты этуьв керек. Урыслардан бизим командир аз йойымлар ман шыгатаган эди. Ол бизди
коьпке уьйретти. Командирполковник: «… гаубица аткан сонъ, турган ерден баска якка коьшпеге сизде тек 3 такыйка бар» – деп арымай кайтаралап туратаган эди. Аьли болса, биревге де сыр тувыл, гаубица
атканнан сонъ сол ерде калув кавыфлы экени, – деп боьлиседи ердесимиз.
Согыс спецоперация озган ерде Херсон областинде Сталинбек Менлигулович алты ай болды. Баслап, саны коьпке арткан яв ман, авыр урысларда олар коршалавды ыслап, кыйын болса да, артка таймаганлар. Оьзек те, коьп зат бизге белгисиз.
«Бек коьп йигитлик эткен, савгага тийисли аьскершилер неге оны алмайдылар?» – деп СВО катнасувшылары оьз командириннен сораган заманлар да болган. Аьскершилердинъ сол соравына командир: «Энъ де уьйкен савга – ол яшав, аман калувынъыз» – деген явап берген. Ким соны ман эрисип болар? Сталинбек Янгишиевтинъ соьзлери мен, алды сызыкта оларга Яратувшыга сеним коьмек эткен. Аьскершилер атаанамызды, ян йолдасымызды, балаларымызды аьли де коьрмеге амаллы болайык деп тилек тилегенлер.
Мага бир неше кере бизим баьтир-ердесимиздинъ туьрли ьшараларда шыгып соьйлевининъ шайыты болмага туьсти, айтпага, мектебтеги патриотлык шаралар эм авызашар. Сталинбек Янгишиев аьр дайым да кайдай соравга да, каьмбил эм тувра явапты тез берип болады. Оьзи окыган А-Х.Джанибеков
атындагы мектебиндеги Аталык коршалавшы йылынынъ ашылувына багысланган шарада ол балаларга ийги окымага, элин суьймеге шакырув этти: «Аьскершиге билимлер керекли тувыл деп ойлаганлар, бек
янъылысадылар. Согысларда билимлер бек керекли, боьтен ьде эсап бойынша. Артиллеристке эсап борышлар шешпеге эм расчетлар этпеге керек болады, сога коьре ийги артиллеристлер тек эсапты аьруьв билгенлер болмага боладылар». Солай ок Сталинбек сол шарада дин аьдемди бронежилет кимик
яман касиетлерден, наркоманиядан саклайтаганын белгиледи. Дин бизим ердесимизге
Элин суьймеге буршав бермейди, кене де онынъ сол сезимлерин куьшли этеди. Мен ога, дин
туткан аьдемнинъ урысларда катнасувы дурыс тувыл дегенлер тувра айтадыларма, деген
соравымды бермей болмадым. «Аьскершилер элине яв шапканда, оны коршаламага, онынъ
уьшин колына савыт алып явды сокпага ант этедилер, а ислам дини бойынша берген соьзди
эм антты ысламага керек», – деди Сталинбек.
Янъыларда Дагестан Республикасынынъ Аькимбасы Сергей Меликов, СВО катнасувшылары ман йолыгысып, олардынъ маьселелери мен кызыксынган, сол шарада Сталинбек
Менлигул увылы да катнаскан. Бизим ердесимиз Сергей Алимовичке эм Ногай район етекшилерине СВО катнасувшыларына эс этетаганларына разылыгын билдиреди. Россия увыллары савгалар уьшин явды сокпайдылар, ама оларга – эс маьнели. Бизге болса, сол эс олардан да куьшли керекли. Сонынъ уьшин баьтирлерди билейик, таныйык, олардынъ акында айтайык, язайык, сыйлайык, йолыгыслар
уйгынлайык, сол эсти яс несиллерге де коьширейик.
Н.Кожаева,
РФ Журналистлер союзынынъ агзасы.
Суьвретте: Сталинбек Янгишиев.
