Бу куьнлерде коршалавшыдынъ колында Элдинъ бактысы, ога Аталыктынъ шынты увыллары, аналарынадай этип, алаллыгын коьрсетип келедилер. Бу куьнлерде Украина еринде оьтип турган согыс спецоперациясында бизим коьплеген ясларымы катнасадылар, араларында патшалык савгаларга да етискенлер бар. Мине эки йылдан артык заман сол якларда элди коршалавга оьз уьлисин косып туры Тимур Улыбий увылы Сагиндиков та. Ол – Ногай районынынъ Ленинаул авылында тувып-оьскен йигит. Онынъ яслыгы, балалыгы сол авылда оьтти. Тынышлы яшавда оьмир суьрип келген яс аьдем согыста катнасарман, боьтен де, Аталыкты коршалавдынъ алдында турарман деп ойланмаган да болар, ама бакты бизди кайдай йолга да туьсиреди эм соны ман алып та барады. СВО катнасувшыларынынъ коьбиси касиетлерине коьре бек каьмбил боладылар, бу куьнлердеги аьрекетлери акында коьп хабарламага да суьймейдилер, ама олардынъ этетаган ислери сыйлавга эм оьктемсуьвге тийисли болады. Мен газета окувшысын аьли таныстырмага суьетаган аьдем мен оьзим де коьзбе-коьз коьрискенмен деп айтып болмайман. Неге бу аьдемнинъ акында язбага токтастым десенъиз, хабарым булай: Биринши кере Терекли-Мектебтинъ «Ногай Эл» балалар бавында СВО катнасувшыларына багысланып, олардынъ суьвретлери салынып, аьзирленген буклетлердинъ ишинде «Тимур Сагиндиков» дегени коьзиме туьсти (оьзимнинъ де кыз тукымым Сагиндикова, белки, сол мени аьвликтирген болар), кызыксындым, ама сол заман язайым деген ниетим болмады. Соьйтип, заьлим заман оьтти, Уллы Аталык согысынынъ 80 йыллык мерекеси белгиленеектен алдын коьп шаралар оьттилер, сол санда – хатын-кызлардынъ катнасувы ман озгарылган автоювырув. Шара ишинде мен де катнастым, конак болып Ногай районымыздынъ Ленинаул мектебине келип, меканнынъ кирген еринде коьп ярасык материаллар СВО катнасувшыларына багысланып аьзирленгенин коьрдим, мунда туьрли суьвретлер, согыс спецоперациясында катнасатаган баьри авыл яслары акында да билдируьвди таппага боласынъ, авыл, оьлшемине коьре уьйкен болмаса да, Аталыкты коршалавга шыкканлар саны мол экен. Сонда да меним назарымды Тимур Сагиндиков алды. Суьвреттен бек куватлы, тувра карасы ман йигерли йигит карагандай болады. Тимур аьскершидинъ аьрекети акында ойланмаган. Онынъ яслыгында коьргени эм билгени – атасы Улыбийдинъ Афган согысында катнасканы. Ким биледи, Тимурга, буьгуьн сайлаган йолында, белки, атасы ога коьрим болгандыр. Тимурдынъ ис аьрекети элимиздинъ сырт якларында басланган эди. Яс оьз аьелин туьзгеннен сонъ, Мурманск каласына коьшеди эм сонда Аьскер-тенъиз флотында аьрекетин бардырады. Соннан ол согыс спецоперациясы озып турган ерге де ис борышы бойынша кеткен. Хатыны Гульнарадынъ хабарлавыннан: – Тимур Аьскер-тенъиз флотынынъ 200-нши мотострелковый бригадасынынъ тамада матросы болып куллык этетаган эди, бу куьнлерде СВО озып турган еринде алдышылыкта турады. Ол 2023-нши йылдынъ январь айыннан алып элди коршалавда, соннан бери Украинадынъ кайсы кесек ери уьшин куьрес озган болса, сол еринде болды деп айтпага да болады. Аьлиги заманда ДНР япсарларын яклавда турады эм явдан тынышлы халкты саклавга баьри куьшин де салады эм Эл алдында берген антын ыслайды. Арада бир тийисли кыска болжаллы тыншаювга келеди, сол заманларда биз онынъ коьнъилин коьтерер ниет пен, оьзимиздинъ суьйинишлеримиз бен, ол янымызда болмаган шакларда эткен ислеримиз бен боьлисемиз, – дейди ол. Оьзек те, согыс спецоперациясы озып турган ерде аьрекет бардырув тынышлардан тувыл. Кыйналады СВО еринде ювыклары болган аьдемлер, кыйналамыз олар ман бирге биз де, тынышлы аспан астында яшап турганлар, сол олардынъ куьш салувы ман болатаган зат. Тилеймиз ясларымызга тынышлыкты эм рахатлыкты. Тезден келер бу енъуьв де уллы Россия элине, неге десе бар бизде йигерли йигитлер…
Галима Курганова,
РФ Журналистлер союзынынъ агзасы.
Суьвретте: Т.Сагиндиков.