Аьскерши оьз савыты ман тувыл, Элине алаллыгы ман куьшли. Ол бир кере Элине алаллыкка антын берип, сав яшав бойы ога алал болып калады. Сол юрекке кирген терен соьзлер оьмирлер бойы халклардынъ касиетин кеплеп, шынты патриотизм сезимининъ маьнесин ашык белгилеп береди. Биз сол Аталыкты саклавшы йолын сайлаган ердеслеримиз бен бек оьктемсиймиз. Йигитлеримиз оьз яшавлары уьшин коркпай, парахатлыгымызды, тынышлы яшамага, ислемеге, окымага ыхтыярымызды коршалап келедилер. Олар йигитликтинъ, Элимизге шет-кырыйсыз суьйимнинъ оьлимсиз уьлгиси боладылар.
Буьгуьнлерде баалыклар сыйы аста тайып барган заманларда, боьтен де оьсип келеятырган несилде патриотизм эм гражданлык сезимлерин беркитуьв бек маьнели. Мектеб
– ол Элге суьйим, яваплылык, йигерлик, юмартлык деген энъ маьнели сапатлардынъ негизи кепленетаган ер. Мунда «Баьтир Партадынъ» ашылувы айырым маьнеди тутады. Сол проект, бизим коршалавшыларымыздынъ эстелигин оьмирлетип калмай, яс несилге коьрим алмага маьнели булак та болады.
Ол балаларга йигитлер арамызда яшайтаганы эм олардынъ кайсысы да элининъ келеектегисине оьз уьлисин
коспага болаягы акында эсине дайым салаяк. Янъыларда Дагестаннынъ Ногай районынынъ Карасу авылынынъ яшавында маьнели, юректи телезиткен, кезекли «Баьтир партасы» ашылды. Эндиги Карасу авыл орта мектебининъ 10-ншы классында бу уьшинши «Баьтир партасы» болады, а савлай мектебте согыс спецоперация катнасувшыларына, согыс ветеранларга багысланган 16 парталары ашылганлар. Янъы ашылган парта мектеб выпускниги, согыс спецоперация катнасувшысы, буьгуьнлерде оьз аьскершилик борышын толтырып, дав майданда йигитлик, коркынышсызлык коьрсетип келетаган Артур Шаабиевич Тангатаровка багысланган эди. «Баьтир партасын» ашпага ыхтыяр онынъ ювык аьдемлери – анасы Асият Тангатаровага, класс етекшиси Байбике Нугмановна Даутовага берилди. Олардынъ коьзлеринде оьктемлик
эм юрек телезуьв аян коьринди, айткан соьзлеринде оьз увылына эм окувшысына терен сеним бары сезилди.
«Баьтир партасына» биринши болып олтырмага ыхтыяр мектебтинъ ийги окувшылары – Аварбийке Аруновага эм Ралина Бекмурзаевага берилди. Шынты йигиттинъ уьлгисине тенълеспеге, сондай бийик етимислерине шалысув – ол уьйкен сый болып калмай, уллы яваплылык та болады. Сол куьн савлай мектеб окувшылары уьшин патриотизмнинъ шынты дериси болды. Ол аьр бир окувшыга йигитлер арамызда яшайтаганы, олардынъ акында эстелик – ваьлий борыш эм намыс экени акында
эске салды.
Артур Шаабиевич Тангатаров Ногай районынынъ Карасу авылында 1985-нши йылдынъ шилле айынынъ 29-ншы куьнинде тувып оьскен. Артур етимисли окыган, мектебтинъ ямагат яшавынынъ белсенли катнасувшысы болган, кайсы берилген борышын да яваплы толтырмага шалыскан окувшылардынъ бириси эди. Мектебти 2000-ншы йылда тамамлап, Артур Махачкаладагы финанс-экономикалык колледжге туьсип билим алады. Оннан сонъ билимин педагогикалык университетинде бардырды.
2006-ншы йыл Ногай районы бойынша ОУПДС-да судебный приставы ис аьрекети мен каьрлеп, оьзин яваплы эм етимисли куллыкшы этип коьрсеткен. 2018-нши йылдынъ кырк кийик айында Артур оьз аьели мен Москва каласына коьшеди, онда ол «Мострансавто» ОООда ети йыллар бойы коьлик айдавшы болып куллык этеди. 2025-нши йылдынъ навруз айынынъ 28-нши куьнлеринде Артур Шаабиевич яшавында маьнели токтасты алды – ол согыс спецоперация юрген ерге ортакшылык этпеге йолланды. Онынъ согыстынъ алдышылык сызыгында коьрсеткен етимислери Эли мен бааланмай калмады. 2025-нши йылдынъ сары тамбыз айынынъ 9-ншы куьнинде коьрсеткен баьтирлиги, оьз аьскершилик борышын толтырувда коркынышсызлыгы уьшин Артур Тангатаров Россиядынъ Коршаланув министерствосынынъ «За воинскую доблесть»
II дережели медалине тийисли болган.
Сол савга ол элининъ кызыксынувларын энъ авыр аьллерде коршаламага аьзир болганынынъ шайыты болды. Озган йылдынъ караша айынынъ 19-ншы куьнинде СВО юрген
ерде согыс аьскерлик борышын толтырувда коьрсеткен йогары кеспилиги, йигитлиги эм берген антына алаллыгы, аьскер борышларын уьлгили толтырганы уьшин ол аьскер
боьлиги етекшилевининъ Сый грамотасына да тийисли этилген. Аьскер етекшилевиннен алган разылык соьзлери онынъ ийги сапатлары акында аян шайытлайдылар.
Буьгуьнлерде Элимиздинъ шынты коршалавшысы согыстынъ алдышылык сызыгында явды каты согып келеди. Онынъ тувган мектеби, билим берген окытувшылары оьз выпускниги мен оьктемсийдилер. Тувган еринде Артур Шаабиевичти онынъ суьйикли аьели, кардаш-тувганлары, авылдаслары, дослары Енъуьв мен аьсиретли саклайдылар. Олардынъ суьйими, ийги тилеклери эм коьтергишлеви – тынышлы келеектегимиз уьшин куьресип келетаган йигит ердесимизге уьйкен куьш булагы болады.
Артур Шаабиевич Тангатаровтай йигитлеримиздинъ сыйына Карасу авыл орта мектебинде он алты «Баьтирлер парталары» ашылганлар.
Сол 2018-нши йылда «Единая Россия» партиясынынъ ой-ниети бойынша басланган Савлайроссиялык билимлендируьв проекти согыс спецоперацияда ортакшылык эткен, йигитлик, коркынышсызлык коьрсеткен ердеслеримиз акында эстеликти оьмирлетип келеди. Сондай аьр бир парта яс арка уьшин, тек муьлк болып калмай, Аталыкка уьйкен
суьйимнинъ, намыстынъ белгиси болып келеегине соьз йок.
Г.Нурдинова.
Суьвретте: шарадан коьринис.
